6 buba UN Secretary General, Ghali arishi küm 93 tain lia asü

Geneva, February 17 (Agencies): Tesüiba United Nations (UN) Secretary General, Egypt nunger Boutros Boutros-Ghali arishi küm 93 tain lia asüba osang ka ketdangsertemi metetdaktsüogo.

Egypt aser Israel na tsüngda yimjung tezüngzüktep agidakja par linük ana tsüngda tesendaktep junga kümdaktsüsang, Ghali-i 1992 nungi tenzüka 1996 küm tashi 6 buba Secretary General ama UN tenzük.

Soviet Union loksaba, Cold War tembangba, United States alima ajunga nung mitkar tashi tulutiba abenba linük akümba aser Africa o Balkans na nung nübur temeten anema inyakba lendongtsüdong tesashi adokba densema, Ghali-i UN Secretary General menden abendang alimai tongti tatalokba balala ajurua liasü.

“Alimai tensa tamajungtiba ajuruba mapang ka nung Ghali-i alima leniogo,” ta shia, UN Secretary General, Ban Ki-moon-i asür Ghali nem tetushi agütsü.

Ano külen, Ghali-i küm 5 tashi UN lenisütsü menden abendang tashishitsü ken o tema benoktsüsa tensa ajuruba osang bushiteta lir.

Asür Ghali-i US sorkar den mangatettep adokba yong US-i Ghali nem UN Secretary General menden tanabenren abentsü lenmang nokdanga UN Secretary General menden abener lenirtem rong nung Ghali kija lenisütsü menden kümsük ka dang abener lenir kümdaktsüba osanga bushiteta lir.

Ghali melenzüka, Ghana nunger Kofi Annan-i 7 buba UN Secretary General küma, 1997 nungi 2006 küm tashi alima ajunga nung temabatiba tentet lenisang menden bena liasü.

Ghali-i menokdangba yong tesüiba mapang, 1994 nung Tutsis aser Hutus nisung million tesadang ka shi anogo 100 nung tepseta Rwanda nung lendong atalok ta shia, Ghali anemertemi pai aija liasü aser “Rwanda lendong menokdangtetbaji UN lenisang ama ni tamakok tulutiba ajurur liasü,” ta Ghali-ia tesülen metetdaktsü.

Egypt yimtiba, Cairo nung tentetba mozüki ka nung anogo ishika taneptsü bushia lir külen Ghali mozükidang asüba osang jangjaogo.