63buba KVSA asayamung kanga meraketa lapokogo

Kohima, Aenjeti 13 (TYO): 63buba Kohima Village Sports Association (KVSA) asayamung Küptoknü nikongtsütsü Kohima local Ground (Khuociezhie) nung kanga takok ngua tenzükogo.
Kohima Village Sports meet nung otsüsütsüsa iba asayamung tenzükba aonung minute 150 shi fire works sayaa liasü. Iba den külemi asayamung lapokba sentong nung shilem ka ama Khels- D. Khel, L.Khel, P.Khel aser T.Khel nungi tanur parnok 1500 shi-i drill, ken aser shadow act (Zhowe Riile) nunger amala sentong balala sayaa liasü.
Maneni lanur parnok 100-i KVSA theme song “Kewhimia” aten. Iba sentong nung 1944 nung KVSA meet tenzükba nungi tang tashi inyakyonga aruba Shadow Act (Zhowe Riile) ka ajanga sayaa liasü.
Kohima yimtsüng Thevokemouzie tesem nung 5:20 ako nung CRCKV Pastor Lhouvizhii Sachii-i temoatsü meshizüka KVSA Torch tsükdaktsü aser iba sülen taoba mapang nung asaya balala nung takok ngua shilem agir parnok 11-i iba milen bener oa asayamung milen tsükdak.
Sentong nung jangratemtsü kaji asayamung nung tetokteper P. Khel, T. Khel, D. Khel aser L.Khel pur pei band party tem den march süa liasü.
Golden-throated barbet (Pezhie-ra) ya asayamung mascot asütsü shimtet koba ‘Kekuokeyho’ ta jatsüogo, aser iba tetezüji ‘mightier and stronger’.
Kohima Village Council mendenbuba Dr. Neiphi Kire-i o jembidang Kohima yimtsüng ka ama longjemer alitsüba nükjidong nung iba asayamung ayongzükba atema asayamung ayonger Kohima Village Youth Organization (KVYO) tenüng asang.
Mendenbubai maneni asayartem dang pei dak aketba sempet tajungtiba agi shilem agitsü ajungshiba den national aser international jenjang tashi nung asayatsü asoshi nükjidong yur asayaa par yimtsüng aser Naga nungernem konang tetushi bener arutsütsü asoshi ajungshi.
State sorkari kenten menu aser sobaliba nung temulung agüja inyakba atema pelaba lemsatepden külemi Dr.Kire-i maneni sorkari saisapong, arts and literature aser shishilembaba tsütsü tali temulung agüja inyaktsü nüngdakba lemsatep, kechiyong Naga nunger dak item nung shilem tajung agitettsüsa sempet lir.
Tepelaba lemsatepba den KVYO tir Medozhatuo Rutsa-i ashiba agi, iba asayamung ya 1944 küm tenzük aser mapang talangka aruogo. Paisa ashiba agi, Kohima yimtsüng nung alirtem atema iba ya asayamung ka dang masü saka benjungmung ka lir.
KVYO games & sports secretary Neilazetuo Khezhie-i asayartem kulizüngtepba achaayanga agi aser Kohima yimtsüng head GB Medo-o Keretsii-i par sobaliba ama temoatsü meshiba sentong agi.
Aenjeti 19 nü asayamung shibangba sentong nung Kohima Village Gazetted Officer Association tir Er. Keviletuo Yiese tetushi tesemdanger asütsü.
Hopta ka peyong asayatsü aliba asayamung nung athletics, chess, football, basketball, volleyball, table tennis, badminton, wrestling aser cross country race nunger asayatsü. Iba asayamung nung asayar 400 shi-i shilem agitsü.
Iba asayamung ya Aenjeti 15 nü nungi asaya tenzüktsü.