67 buba SASU lokti mungdang tang temungdak lir

Kohima, January 28 (TYO): Southern Angami Students’ Union (SASU) indang 67 buba Biennial General Conference sentong Phesama nung aliba St. Paul School nung January 27, 2017 nungi tenzükogo.
Kümnabuba nung khen amungba lokti mungdang ya “Be an asset not a liability” omen nung ajemdaker amonger. Iba mungdang nung tongti o jembirji NPSC Secretary, Khrupi Sothu lir.
Kaketshir shiai nükjidong tajung yur meranga azüngtsü asoshi, Khrupi-i ayongzük.
Pai kaketshirtem dang, kaket shisatsü bushiba mapang taküm nung nükjidong tajung kaka yur, meranga azüngtsü aser nükjidong makaba nisungji rongnir maliba rong ka mesük lir, ta ashi.
Tanü-asüng tensa nung kaketshirtemi sorkar mapa kisüng bushir, aser iba nükjidong tongtettsü tamakoktsü kümogo, anungji pei sempet ajiteter pei poksünga, lokti asoshi mapa tajung inyaker kaka asütsü merangtsüla, ta Khrupi-isa ayongzük.
Competitive tatidang balala agütsüba mapang temolung majemi, pei sasa pei dak temolung lemer, meranga azüngtsü asoshia pai ajungshi aser career guidance seminar amala sentong balala ayongzüka agitsü shisem.
Iba sentong nung SAPO Treasurer, Virul Kikhi-ia o jembi aser Thepfusa Domenic Zashumo Catechist-i sarasatem. Iba sentong Kekhusezo Zao-i ani aser Vizodi Tepa-i temeja ken ka aten.