67 Republic Day parade nung inyakyim tasen 5 liasü

New Delhi, January 26 (Agencies) : Delhi nung 67 buba Republic Day benjung nung parade alidang tang mezüng atema inyakba mapa pungu liasü.
New Delhi kübok Rajpath nung 67 buba Republic Day parade nung India mitkar tashi aser sobaliba takar naroküm kanga meraketa sayuogo aser iba sentong nung tetushi süa jaoker France Tir, Francois Hollande-ia itemji nguogo.
India Republic Day otsü nung tan mezüngbuba atema bendang linük ka nungi sepaitemi parade nung shilem agi aser ibaji tanü France’er 35th Infantry Regiment nungi sepaitemi shilem agiba liasü.
2009 küm Bastille Day nü Paris’er Champs-Elysees nung India nunger sepaitemi shilem agiba meyipja taküm Republic Day nung France sepaitem nema shilem agidaktsü.
Küm 26 sülen Army dog squad-i shilem agi. Tanü parade nung Army kübok Remount Veterinary Corps nungi azü telok kati parade nung shilem agia liasü. Azü telok nung Labrador aser German Shepherd taputem liasü aser azütemji Kashmir nung tapoktsü, landmines aser rüjeb anenzüka alubatem mitdaktsür. Tanü sentong nung shilem agidaktsütsü asoshi Army indang azü 1,200 nungi azü 36 dang shimtet aser parnok hopta aika training agiba sülen tanü shilem agiogo.
Tesüiba mapang Republic Day parade nung Ex-servicemen-ia shilem agia aru saka takümbo parnok asoshi tableau balaka liasü. Tan mezüng atema parade tetenzüklen army veteran nem tetushi agütsüba tableau ji amshi.
VVIPs atema aina-i yangluba kilem ka taküm mezüng amshi. Yaküm Republic Day parade tagidak nung tzünglu aru aser iba jagi tetushi süa jaoker, US Tir, Barack Obama anüshi tulu ka kübok jenoktsüsa aküm. Iba ya tayongertemi atema maaksü liasü aser iba jagi takümbo VVIP tem amendak ‘motorised sliding glass roof’ ka enok.  Iba kilemji Air Force tayimtsütem süidang lapok.
Taküm agiba parade nung Bravery Award anguba tanurtemi shilem agi. Iba ya taküm mezüngbuba agi aser National Awards for Bravery angurtemi parade tatemlen jaja. Tesüiba Republic Day parade tem nung Bravery Award anguba tanurtem shiti ma nung mendaktsür parade nung shilem agidakja liasü.