6buba Nagaland Spelling Bee C’ship nung parnok 41 toktep

Kohima, September 28 (TYO): Fountain Club Kohima aser SCERT na longjemer 6buba Nagaland Spelling Bee Competition Capital Convention Centre Kohima nung kaogo. Iba tetoktepba nung Kohima, Dimapur aser Phek nungi kaketshir parnok 41-i shilem agi. Parnok ya school 21 nungi liasü.
Anogo ana Spelling Bee tetoktepba ya “The learning edge” omen nung ajemdaker agi aser Kohima Deputy Commissioner, Rajesh Soundararajan-i lapoktsü. Pai iba amala tetoktepba ajanga English oshi tamshiyim shidak amshiba tsütsü terenlok bener arutsüba, aser kaketshirtem molungjang nung tokteptsüba tejangraba ka apuoktsütsü imlaba lemsatep.
Iba oshi-oben tsütsü tetoktepba ajanga tanü asüng lima nung Information Technology agi amokbanger spelling amshiyim raksaa tesadang agi dang zülutepba mapang ka nung kaketshirtemi spelling shidak amshitsübaji koda tongtibang, aji angatettsü.
“Asenoki English ojangtem short form amshitsüba majungshitsüla, aser tarutsü nung iba ya yimya ka akümtsü nungi nokdangtsü,” ta DC-i ashi. Kasa mapang nung pai kaketshirtem nem spelling shidak amshitsü nüngdakba angazükdaktsütsü asoshi iba amala tetoktepba ayongzükba atema sentong ayongzükertem nem tenüngsang agutsü.
Additional Director SCERT Nagaland, Kezhalenuo Lesiezie-i okialaba mapang nung ashiba agi, iba tetoktepba ya 2012 nungi kaketshirtem ajangzükdaktsütsü nükjidong nung longjemer inyaka arudar. Iba amala modern technology-i aniba lima ka nung kaketshirtem spelling tsütsü tashi meiti aruba reprangtetogo, ta lai ashi.
“Onoki iba tetoktepba ya tajemdakdak ser kaketshirtem atema temaba jenjang nung kaketshitsü angazüka aotsü atema sabang ka lapoktsütsü asoshi nükjidong lir,” ta lai ashi. Laisa ashiba agi, iba tetoktepba nung sorkari aser nija school balala nungi arua shilem agitettsü.
Iba tetoktepba nung takoker nem senpet yamai agütsütsü: Mezüngbuba jenjang nung takok angur nem sen 60,000, tanabuba jenjang 40,000, tasembuba atema sen 20,000, aser pezübuba atema sen 15,000 agütsütsü aser iba den külemi ano trophy aser certificate agütsütsü. Quarter finalist tem nema sen 5,000 den certificate agütsütsü.
Iba tetoktepba tatembangbuba sentong asüng nikongdang 4:00 ako nung akatsü.