7 buba Pay Commission 2016 küm tom nungi benoktsü akok: Arora

New Delhi, December 02 (Agencies): India nung sorkar mapa inyaker indang ita sen noklang nung shilem 23.5 agi timba küma ajungketer agütsütsü asoshi renemba 7 buba Pay Commission sangküm 2016 küm tom nungi ang mapa küma benoktsü akok, ta Macquarie India nung Managing Director & Research lenisang, Rakesh Arora-i metetdaktsüogo.
“India nung 7 buba Pay Commission taruba 2016 küm tom tashi nung ang mapa küma benoktsü akok. Ajisüaka, yamaji asangsang nung ataloktsü asü mataloktsü ibajia mejangjateti lir, kechiyong India sorkari ita sen tutsütsü onükji agizükba sülen ang iba maparen asangsang nung mapa küma inyaktsü,” ta pai ashi.
Paisa ashiba agi, 6 buba Pay Comission-a küm 3 shi süir ang mapa küma benoka liasü.
Justice AK Mathur-i aniba 7 buba Pay Commission ludeni sorkar mapa inyaker ita sen timba küma ajungkettsütsü onük India Finance Minister, Arun Jaitley den taoba November ita nung benoka lir.
India Cabinet yimsüsürtemi onükji agizükra, Centre sorkar mapa inyaker aser pension agirtem indang ita sen sangküm 2016 January ita 1 nü nungi tenzüka timba küma ajungkettsütsü.
Ajisüaka, 7 buba Pay Commission mapa küma benokba ajanga India’er rongsenren jenjang mejungi kümdaktsütsü akok ta sorkari tebilemtsü khuret benoka lir.
7 buba Pay Commission mapa küma benoka ajanga India sorkar senpong nungi sen crore lakh 1.02 shi taoba mapang nungi timba agütsüsemtsüsa akümtsü.
Centre sorkar mapa inyaker ita sen indang Basic Pay noklang nung shilem 16 aser Allowance noklang nung shilem 63 densema ita sen noklang nung shilem 23.55 agi timba küma ajungkettsütsü asoshi 7 buba Pay Commission ludeni benoka lir.
Taoba mapang, 2008 küm 6 buba Pay Commission mapa küma benokba sülen sorkar mapa inyaker ita sen noklang nung shilem 35 agi timba küma ajungketja liasü.