7 buba Silver Cup: Blue Star o Hornbills B na final-i iogo

Kohima, March 24 (TYO): Taoba champions, Blue Star Cricket Club Dimapur aser Kohima Hornbills ‘B’ telok nati semifinal asaya koka tang tasayadak 7 buba Silver Cup Twenty20 (T20) Cricket Tournament asayamong final nung shilem agitsü jenjang tanü, Brehostibar nü ajangzükogo.
Tanü mezüngbuba semifinal asaya nung Blue Star teloki runs 48 agi Diphu XI telok madak takok ngua liasü.
Tezosel-i runs 30 yangluba densema, par Blue Star teloki overs 20 nung wickets 5 laoa ajak agi runs 177 tashi yanglu.
Tesülen, Diphu asayartemi kanga meranga asaya saka par asayar ajunga overs 17.3 nung asayadak nungi temaleni tugua ajak agi runs 129 dang yanglutetba yong par teloki tamakok ajuru.
Mezüngbuba semifinal asaya nung runs 23 agiba den külemi, wicket 3 tashi agisang, Blue Star asayar, Muzibur Man of the Match shim.
Hornbills ‘B’ telokia wicket 7 agi Missionshires telok madak tanabuba semifinal asaya akokba osang jangjaogo.
Missionshires teloki mezüng batting asü aser par teloki wicket 9 laoa ajak agi runs 107 yanglu.
Tesülen, Hornbills ‘B’ teloki wicket 3 laoa overs 14 nung Missionshires teloki yangluba runs ajangteta asayaji kokadok.
Hornbills ‘B’ asayar, Anga tanabuba asaya nung Man of the Match shima liasü.
Tanü semifinal asaya akoker, Blue Star telok aser Hornbills ‘B’ telok nati tan Honibar anepdang 9:00 ako nungi tenzüka final asayatsü.
Ano külen, asayamong sempet agütsüba sentong nung Group Commander, NCC Headquarter, Brig. MS Nikam aser Joint Director, Dr. B. Lama na tongti tesemdanger aser tetushi tesemdanger alitsü.