7/11 lendong dak sentakba nung nisung 12 aitsüogo

Mumbai, September 11, 2015: Mumbai nung bomb tenet pokdaktsüba nung aitsür alirtem Mumbai, Maharashtra Sessions Court-i anir aoba noksa nung angur.

Mumbai, September 11 (Agencies): July 11, 2006 nü Mumbai nung train poksatsüa nisung aika taküm lalutsüba lendong dak sentakba nung MCOCA court ka ajanga nisung 12 aitsüogo aser ka tai mali ta obendang agütsüogo.

Hombar nü telok anatsülen nungi o angadanger külen ang parnok nem kechi temerenshi agütsütsüar lemtettsü.

Pressure cooker nung RDX bomb tenet sepbanger pokdaktsüba lendong nung nisung 209 asü aser nisung 700 tashi yiru. Bomb tenet prong ya yimti nung aliba suburban train network nung Western Railway line len apok.

Mezüng bomb nikongdang 6:24 akok nung apokba sülen minute 11 tsüngda tanüngba bomb trok prongla apok. Iba lendong ya nüburtem mapa temer kidangi shilangba mapang ataloka liasü.

Bomb ajakji Churchgate nungi aoba train tem indang ‘first-class general compartment’ nung yuja liasü. Bomb temji Matunga Road Station anasa Mahim, Bandra, Khar Road, Jogeshwari, Bhayandar aser Borivli tesem tem nung poka liasü.

Iba lendong dak sentakba nung Judge Y D Shinde-i aitsür alirtemji Kamal Ansari, Asif Khan, Mohammed Faisal Ataur Rahman Shaikh, Ehtesham Kutubuddin Siddiqui, Naveed Hussain Khan, Tanvir Ansari, Mohammed Majid Shafi, Shaikh Mohammed Ali Alam Shaikh, Mohammeed Ansari, Muzammil Sheikh, Soheil Shaikh aser Zameer Shaikh nunger lir.

Parnok rongnung par pongu Indian Penal Code (IPC), ocet 302 nung aitsüa lir koba nung alenseta südaktsütsü atema obendang agütsütsü tashi lir.

Parnok rongnung tai mali ta obendang agüsangji Abdul Wahid Shaikh lir.

Tanüngba 13 ji Students Islamic Movements of India (SIMI) züngsemtem lir koba sorkari 2001 küm nungi kiralongrar telok ta jatettsür shibangja liasü.

Anti-terrorism squad (ATS)-i ashiba agi, parnoki iba bomb pokdaktsüdang Pakistan nung aliba Laskhar-e-Taiba teyari agia liasü.

Iba dak sentakba nung court-i tenük küli angur nisung 192 aser defence team-i nisung 51 dang asüngdangya süogo, ta ketdangsertemi ashi. Tenük küli angur rongnung IPS personnel ti, IAS officer pongu aser doctor ti dena liasü.

Court-i küm tenet tashi iba tatalokba otsü bendena kaket nung tapak 5,500 dak tema tashi zülutenba nung ajemdaker iba obendang ya agütsüogo.