7/11 Mumbai train lendong agütsür 5 tasüba agi merenshitsü

7/11 Mumbai nung train aika poksaja amakba ken o nung aibelener nisung pongu tasüba agi merenshitsü Mumbai nung aliba special MCOCA court-i tanü obendang agütsüogo.

Mumbai, September 30 (Agencies): Küm teku tejaklen bomb amshia Mumbai nung train aika poksatsüba lendong nung nisung 189 asü aser 800 dak tema yiruogo, aser iba ken o nung tanü special court kati nisung pongu tasüba agi merenshitsü aser nisung tenet akümli piyong tepouktak ayutsü obendang agütsüogo.

MCOCA Judge, Yatin D Shinde-i arishi küm 37 Kamal Ahamed Ansari, Mohd Faisal Shaikh (36), Ehtesham Siddiqui (30), Naveed Hussain Khan (30) aser Asif Khan (38) nunger tasüba agi merenshitsü obendang agütsü.

Ano akumli piyong tepouktak ayutsüpur nisung tenetji- arishi küm 37 Tanvir Ahmed Ansari, Mohammad Majid Shafi (32), Shaikh Alam Shaikh (41), Mohd Sajid Ansari (34), Muzzammil Shaikh (27), Soheil Mehmood Shaikh (43) aser Zamir Ahmad Shaikh (36) nunger lir. Parnok ajak ya temzüngi memelaba telok, SIMI den tesentaktep lir.

2007 küm minute 10 tsüngda Khar Road-Santacruz, Bandra-Khar Road,Jogeshwari- Mahim Junction, Mira Road- Bhayander,Matunga- Mahim Junction aser Borivali tesemtem nung bomb tesashi ajanga suburban train tenet poksaja liasü.

Item train nung RDX bomb tenet apokba ajanga nisung 189 tashi asü aser nisung 829 tashi yirua liasü.

ATS-i ashiba agi, Improvised Explosive Devices (IEDs) ji Mumbai, Govandi nung aliba takdang ka nung yanglu aser bomb yanglurtem rongnung Pakistan nungera kar densema liasü.

Iba tatalokba ken o mapang talangka kaa aruba sülen taküm September 11 nü court-i tai tonglokja alir parnok 13 rongnungi parnok 12 aitsü aser ka chiokogo.

Tang aija alir ajakji IPC, Explosives Act, Unlawful Activities Prevention Act, Prevention of Damage to Public Property Act, Indian Railway Act aser MCOCA kübok section kar nung aitsüogo.

2006 November nung Anti Terrorism Squad (ATS)-i nisung 30 dak tai tonglokja liasü aser parnok rongnung nisung 17 bo menguteter.

Samar alir parnok 17 rongnungi parnok 13 bo, Lashkar-e-Taiba züngsem Azam Chima densema Pakistan nunger 13 lir.