71buba Chakhesang Students Union lokti senden agi; Asenoki ILP kanga junga benoktsüla: CM Rio

January 23, 2020 nü Pfutseromi yimdak Pfutseromi Village Students Union küm 75 ajungba Jubilee nüngshilong azüngtsüba sülen Nagaland Chief Minister, Neiphiu Rio den Minister, Advisors, public lenirtem aser CSU ketdangpurtem külemi tangokba noksa nung angur.

Pfutsero, January 23 (TYO): January 23, 2020 nü Pfutseromi yimdak Nagaland Chief Minister, Neiphiu Rio 71buba Chakhesang Students Union lokti senden nung aden; iba senden ya Pfutseromi Students Union Jubilee-a amshia among, ta ketdangsertem osang ka ajanga metetdaktsü.
Iba sentong nung jembidang Chief Minister-i, iba sentong nung adenba atema pelaba den külemi küm tasen salem lemsatep.
“Asenok ya kanga tetoktepba aliba lima ka nung alir aser taküm alitsü ya temela masü, anungji asenoki akümli ya aknga süoki ia agitsüla,” ta pai ashi.
CM-isa, “Ni Chakhesang nunger kanga akhümtsübur. Phek district ya sobaliba district ka lir aser Chakhesang nungeri tang tashi takar sobaliba benshir. Chakhesang kin ya Naga nunger rongnung kanga renlokba kin ka lir aser literacy rate nunga Phek district kanga junga kümogo,” ta metetdaktsü.
“Ni Pfutsero, talisa Pfutseromi yimer den tesendaktep junga lir, aser Chakhesang Students Union nung Pfutseromi Students Union ya samanir dang masü saka lenir tajung aika adokdakja Naga nunger atema mapa tajung jenti inyakogo,” ta Rio-isa metetdaktsü.
“Shisaliok ya jangratemtsüka lir aser süoki ia agitsü lenla ka lir, kechiyong asen limai Khristan yimsü aruba sülen Naga nunger atema tajungtiba atalokba rongnung shisaliok ya liasü ta asenoki metet. Anungji asenoki, talisa kaketshirtemi shisaliok ya süoki ia agitsüla, kechiyong ibaji ajanga asenoki tarutsü atema yangertsü,” ta pai ayongzük.
Naga yimten onük tsütsü pai, nisung aiakti politics indang jembir, saka teinyaker aser metongshia inyaker mali. Naga yimten ken o atema tesüiba jenti Naga nungeri timtema aruogo, kechiyong iba ya asenok temeden lir, ajisüaka asenoki takoktsü aser makoktsü asadanga kanga junga shisadanga inyaktsüla, ta ashi.
CAA onük dak sendakba nung pai, “Nagaland nung Bengal Eastern Frontier Regulation Act 1873 benoktsüla ta sorkari takhangba agütsüba sülen India sorkari agizük. Northeast nung schedule tribes 6 densema asen Naga nunger CAA nungi kümzüker,” ta ashi.
“Union Home Minister-i CAA ajanga Naga nunger mekongshitsü ta shiogo, ajisüaka asenoki ILP ya timi amshitsüla, kechiyong lendongji- asen nisungtemi tim mesüi amshitsü akok, anungji ILP junga benoktsüji Nagaland sorkar teinyaktsü mapa,” ta CM-isa metetdaktsü.
Sentong tetenzüklen Chief Minister-i Platinum Jubilee nüngshilong semzüktsü aser iba sentong nung Neiba Kruno, Minister Planning & Co-ordination, Land Revenue, Parliamentary Affairs, Pukhayi Sumi, Advisor Food and Civil supplies and taxes, Mhathung Yanthan, Advisor Horticulture and Border Affairs, Toshi Wungtung, Advisor IPR, SCERT, Village Guards, DC Phek, SP Phek, CSU ketdangpurtem aser public lenir aika dena liasü.
Sentong nung VCC, Pfutseromi Village, Menyelhi Mero-i lokti pelaa agizükba o jembi aser Pfutseromi Village Students Union Tir, Vibi Mero-i Tir onük jembia liasü. Sentong nungsa (Retd) Commissioner & Secretary, Wepretso Mero, NCS-i Pfutseromi village students union putiotsü tongmelang agi lemsatep, President Chakhesang Students Union, Lavoto Chizo-i salem osang aben aser Convener, Planning committee, Platinum Jubilee, Dr Neisatuo Mero-i tepela anküp o jembia liasü.