737 MAX tayimtsü software upgrade sütsütsü

Metsüremi/March 16, 2019 (Agencies): Boeing-i taruba anogo 10 tsüngda 737 MAX tayimtsü atema MCAS stall prevention system upgrade sütsütsü, ta osang ka ajanga metetdaktsü.
Indonesia nung taoba küm October ita 737 MAX 8 tsükokba nung iba system aibelenba ngutetogo, saka taoba hopta Ethiopia indang tayimtsü tsükokba kuli tang tashi mejangja.
Tawa Ethiopia indang tayimtsü metsükok tsüngda iba software yanglushi tenzükogo aser iba ya amenoktsü atema ghonda anashi dang agitsü, ta source ka ajanga metetdaktsü.
Deobarnü Addis Ababa anasa tayimtsü tsükoka passenger 157 aser crew asüba sülen alima ajunga nung MAX tayimtsü mesenzüdaktsüi lir aser Boeing-i iba tayimtsü meyoki sota lir.
Ethiopia indang tayimtsü koba yangluzüker ita ishika dang liasü iba tatyimtsü tsükokba kuli jangjatsü atema black box tem dang France nung mongintemi asadangdar. Iba tayimtsü ya ali nungi yimketa atuba sülen mapang tatsüka dang lir tsükok.
Lion Air 737 MAX 8 koba taoba küm October ita tsükoka liasü, iba tayimtsü yaa ali nungi yimketa atuba sülen mapang tatsüka dang lir tsükok aser nisung 189 tepset. Tayimtsü tsükokba kuli bushitsüngdangba mapang stall prevention system mapa junga minyakba ajanga tayimtsü tsükokba ngutet, koba MAX tayimtsü nung feature tasen ka lir.
America nunger pilot tem aikati MCAS nung timtem aliba metetdaktsüogo aser Federal Aviation Administration-i ashiba agi, parnoki Boeing dang iba tebilemtsü ya April ita tashi nungbo yanglushitsütsü asoshi shiogo.
Aerospace giant puri Brehostibarnü conference call ka achaayanga kaogo aser 737 MAX amshiba carrier asem yanglushitsüogo, ta osangka ajanga ashi. Tanungba airlines tem taruba hopta tetenzüklen yanglushitsütsü.
Source anapronglai anogo 10 tsüngda Boeing puri iba software install sütsü tenzüktsü, ta ashi.
Source ka ajanga ashiba agi, American Airlines shirnok ket nung 737 MAX 8 tayimtsü metsür pezüshi lir, parnoki parnok sasa software update asütsü asoshi shimogo.
Ajisüaka iba soft ware update asüba jenjang kwi asütsü ajibo memetet saka analyst kati tayimtsü shia USD million anana aotsü ta asatetogo.