73buba Jangpetkong Senso Mungdang agiogo

Mkg, February 01 (TYO): Yimjenkimong yimdak January 31 nungi February 1, 2019 nü tashi 73buba Jangpetkong Senso Mungdang agiogo, aser iba mungdang nung tetushi tejaokertemji Minister Higher & Technical Education, Temjen Imna Along Longkumer aser Advisor Law &Justice, Border Affairs, Treasuries & Accounts, Dr. Longrineken na liasü.
Iba mungdang tenzükba aonung sentong nung Temjen Imna Along Longkumer-i, lenla ajungalen len anitsüsa Jangpetkong tzükong dak tashi lir, ta ashi. Paisa lokti dang Naga lokti ajungkettsütsü atema asüngsashitsü ayongzük.
Paisa lokti dang kati ka nem tai tongloktsütepba anentsüla, kechiyong ibaji ajanga lokti tsüngda telongjem dang raksatsütsü, ta ashi.
Sentong nung Jangpetkong Senso Mungdang (JSM) Tir, Nungsangtoshi-i Tir onük jembi aser Limameren Longshore Ex GB-i tayongzükba o jembia liasü. Mongdang tetenzük sentong nung Jangpetkong Senso Telongjem-i sobaliba ken ka tena liasü.
Tanünübuba sentong nung tongti o jembir, Chief Secretary & Finance Commissioner, Temjen Toy, IAS-i “An authentic and upright society” onük nung ajemdaker jembi. Ozüng alema lisem atuba, social media tim mesüi amshiba dak sendakba nung pai lokti dang, tesüiba mapang konang nüngsang agi melung sür melii asen tetsü-tebou nungeri sayuba tatishitsü tajungtem benshitsü ayongzük.
Kasa sentong nung Dr. Panger Longchar-i tayongzükba o jembi aser Khar village Council-i sobaliba ken ka tena liasü. Nikongdang tetushi tejaoker Advisor Law & Justice, Border Affairs, Treasuries & Accounts, Dr Longrineken-i subdivision nung programmes aser terenlok mapa balala inyakba metetdaktsü aser tesem nung rongsenkettsüng azükarutsü atema pa mangdang kar lemsatepa liasü.