Watsü Mungdang 22 buba inti senden takok ngua mungogo

Watsü Mungdang 22 buba inti senden nung Mokokchung D.C Limawabang Jamir-i “Lenpir” kaket sayatsüdang tangokba noksa nung angur. Mokokchung, 27th August, 2021.

Mokokchung, 27 Aug (TYO): Watsü Mungdang 22 buba inti senden Aug 27, 2021 nü yangi Mokokchung town hall nung meraketa mungogo. Alima tensa tia mesüngjemba ajanga yaküm küm nungi iba senden mekateti arur taküm ang agiteter. Iba senden sorkari lateta yutsüba Covid19 SOP shitak amshia liasü.
Sentong nung omen “Aotsür Jenmung” onük nung ajemdaker Library cum Theological Research Consultancy, Mokokchung tentetla Wt. Dr. I. Asongla Pongen-i jembidang, Aotsür jenmungji akhi tsürabur Jungliyimti mapang nungi tejangja yateta yuja kar, anungji, ibaji Aotsüri wazüka ayutsüla, ta shilem tulu aliba kuli dena metetdaktsü.
Tangari Aotsür jenmung meraketa aser akhümketa reprangtsüsa aser maaksü bener aruba jenmung ka masütsüsa libaliru ajungtsüla, tejak repranga inyaksangshi masütsüla, miim o meperokshitsüla ta lai tayongzükba agütsü. ‘Tenüngsang agütsüba nung Aotsür anünga lir, anungji, tajung dangbo junger ta shitettsüla’, ta laisa inyakdaktsünüba o ka ashi.
La mangdang ana lemsatepdang, joko tanü alima ya balaka kümogo aser Aotsüra lenmang aisü nung teburtem meneptepa atudar, anungji, Aor rangben ajungtsü asoshi lemtetba lokti – Ao Senden nung adentsüla aser arogo tsütsü nunga Pastor mapa mesüra executive secretary menden tashi nung mentettsüsa inyaktsüla, ta lemsatepa liasü.
Ao Senden tir, Chubawati Lcr-i tajungshi o jembidang, koba lokti südir süaka tenzükertemji taküm piyong atema shimba masü, anungji, shirnokisa tenzükdir pei mapang nung tajungtiba inyaktsü merangtsüla, ta ashi. Tanü joko Aor jenjang akhi ama masü, anungji, watsülartem teinyaktsü wadang aika lir ta shia chirnurtem tajung adokdaktsütsü asoshi ajungshia liasü.
Mokokchung D.C Limawabang Jamiri tepela o tatsüka jembidang, yaküm Covid-19 wara ajanga alima ajak timtemba mapang Watsü Mungdangi District Task Force den yaritepa mapa tajung aika inyakba asoshi pelaba metetdaktsüba den ano Covid-19 tongpang metembangi lir, anungji, iba nungjia maneni shilem agitsü asoshi khuret kar lemsatep.
Aotsür dak sempet alakteta moatsüba kaji ketdangsüba ya lir, kecdangsür tajung alidakji kechaia anüngakong masür, ta ashi. Aotsür maitsü (identity) koba tetsür temeten aser oshioben lir ibaji wazüka ayuba den Aotsür rongsenkettsüng ajungkettsübaji kanga tongtibang, ta paisa teinyaktsü kar shisem. Sentong nung Mokokchung DC-isa Watsü Mungdangi adokba “Lenpir” kaket ka sayatsü.
23 buba Watsü Mungdang item mendenpur lenisüba nung anir aotsü; tir – Wt. S. Arenla Lkr (Changtongya), Tatong tir – Wt. Odisola (Mongsenyimti), tongti zülur – Wt. Süngtireben (Mopungchuket) aser tatong zülur – Moatola (Khar) parnokji shimogo.