78 Bn CRPF-i 77th Raising Day amung

Bn Hqr Zubza nung Commandant 78 Bn CRPF-i 77 buba CRPF Raising Day amungdang taküm bendanga agütsür nem tetushi agütsüba angur.

Dimapur, July 27 (TYO) : July 27, 2016 nü Zubza, Kohima nung aliba 78 Bn CRPF-i 77 buba Raising Day benjung ayongzüka amung.
78 Bn-i sentong tajung ayongzüka amung aser iba mapang asür Commandant Neeraj Yadav nem tetushi agütsü.
Tanü nikongtsütsü intercompany sports & games tetoktepbatem liasü aser iba sülen kenten sentong ka agir “barakhana” liasü.
Tanü Commandant 78-i osangbener den sensaksemdang ashiba agi, British yimsüsüba mapang July 27, 1939 nü Neemuch, Madhya Pradesh nung aliba British Army cantonment nung iba force tenzük.
British yimsüsüba mapang asünung mezüngbo iba force dang “Crown Representative’s Police” ta aja aser India nüjiso anguba sülen India nung mezüngbuba Home Minister “Iron Man” Sardar Vallaba Bhai Patel-i “Central Reserve Police Force” ta nüngja melen, ta paisa metetdaktsü.
Tanü alima nung para military force tulutibaji ‘CRPF’ lir aser India nung dang masü saka tanga linüktem nunga CRPF-i UN den peace keeping force ama shilem agir, ta paisa shisem.
CRPF-i mapa tajung inyakba atema “Peace Keepers of the nation” ta-a ajar aser tang tashi nung CRPF Battalion 241 lir aser iba dak lia state shia nung Group Centres, Ranges, Sectors aser zones lir.
Durga Prasad, IPS, DG CRPF lenisüba kübok timtem aliba tesemtem, Jammu & Kashmir aser tanga tesemtem nung CRPF-i mapa inyaka arudar. Nagaland nunga CRPF-i civil police den yaritepa Naga nunger nem teyari agütsür aser maneni Nagaland nung force tajungtiba asütsü merangtsü, ta 78 Bn CRPF Commandant-isa metetdaktsü.