7buba Nagaland Spelling Bee c’ship Sept. 27 & 28 nung agitsü

Kohima, Luroi/August 27 (TYO): Fountain Club Kohima aser SCERT Nagaland nati ayongzüka Rongjui/September 27-28 anogotem nung capital convention centre, Kohima nung ‘The Learning Edge’ omen nung ajemdaker Spelling Bee Championship agitsü.
Tanü osangbenertem senden ka nung SCERT Director, T. Sekhose-i, iba sentong ya kaketshirtem atema maongka tajung lir,
Paisa, iba tetoktepba ya sorkar aser nija school nungi kaketshirtem ajurutepa sendaktepba sabang ka lir, anungji sorkar school tem nungi kaketshirtemi shilem agitsüla, ta ashi.
Iba sentong Convenor, Medo Yhokha-i club-i inyaka aruba mapatem metetdaktsü.
Paisa, 7buba edition nung iba tetoktepba ya class 6 nungi class 10 nung azüngertem atema alitsü, aser school shia nungi kaketshir ananai shilem agitettsü, ta metetdaktsü. Yhokha-isa, iba tetoktepba nung lenla balala nung takokertem nem senpet lakh 1.59 agutsütsü aser taküm jurila sempet kaji- Young Speller Award 2018 asütsü, ta ashi.
Pai ashiba agi, mezüngbuba jenjang nung takoker nem senpet sen 60,000, runners-up nem 40,000, tasembuba jenjang angur nem 20,000 aser 4th nem 15,000 agutsütsü, iba den külemi trophies aser citation agutsütsü. Ano quarter final nung tamakok angur nisung pezü shia nem sen 5000 den citation agutsütsü. Young speller award angur nem sen 4000 den citation agutsütsü.
Iba sentong nung shilem agitsü atema sentong ayongertemi state nung sorkar aser nija school ajak jaokogo.
Tejangrartemi portal www.fountainclub.in nungi form download sütettsü aser peipei district nung DIET centres nunga meshitsü akok.