7th Economic Census atema senden amen

Dimapur, February 4 (TYO): February 4, 2020 nü Chief Secretary aser State Level Coordination Committee (SLCC), Chairman Temjen Toy-i 7th Economic Census indang senden ka ayonga amen.
Senden nung district-wise survey indang osang, CSC e-Governance Services India Ltd. ajanga Supervisor tem indang bank accounts nung sen aibelena enoktsüba aser Deputy Commissioner temi timtem ajuruba onüktem benoka lemsatep.
Commissioner & Secretary IT K.D Vizo-i Nagaland nung district ajak nung 7th economic census agiba indang osang lemsatepdang “Iba mapa ya district pungu- Dimapur, Kohima, Mokokchung, Phek aser Peren nung tashimait lir” ta ashi.
“Iba economic census ya March 31, 2020 tashi nung tembangtsüla saka district pungu nung data bendenba nung tashimaitba ajanga iba anogo matongdang metembangtettsü akok. Ajisüaka, Mon, Tuensang, Wokha, Zunheboto, Kiphire aser Longleng nungbo kanga junga inyakdar” ta Vizo-i metetdaktsü.
“Ministry-i residential supervisor aser residential enumerators atema dang sen 40% agütsüogo aser income tax agizüker. Tang tashi nung supervisors aser enumerators nem sen kecha magütsü lir” ta Commissioner & Secretary Economic & Statistics, Kelei Zeliang-i ashi.
“Chief Secretary aser committee chairman-i district pungu indang DC tem dang census mapa tekaraba nung mapa inyaktsü atema shidi zülutsü aser ano Ministry danga income tax agiba nung Nagaland medendaktsütsü atema osang metetdaktsütsü mepishir” ta Kelei Zeliang-isa ashi.
Idangji Chief Secretary Temjen Toy-i nüngdakba ajak inyaktsü aser Ministry aser DC ajak dangi shidi zülutsü ta nangzük.
SLCC züngsemtem rongnung, Chief Secretary, Commissioner & Secretary Industries & Commerce, Commissioner & Secretary Rural Development, Commissioner & Secretary IT, Labour Commissioner, Director Industry & Commerce, Director IPR, Director IT, Director Economic & Statistic, DDG, State Regional Officer, NSSO(FOD) l, Joint Director & and Nodal Officer 7th EC , Economic & Statistics nungertem dena lir.