7th NAP Bhandari Commandant-i sen lakh 39.28 talila agizük

Kohima, Rongjui (September) 22 (TYO): Wokha district nung Bhandari sub-division kübok 7th NAP Battalion indang Commandant-i October 2015 nungi February 2017 tashi nung sen lakh 39.28 talila agizük.
March 31, 2017 tashi tembangba küm atema CAG report agütsüba nung, Commandant-i October 2015 nungi February 2017 tashi battalion nung Grade-IV employees indang itasen aser allowance atema sen crore 34.53 agizük.
Ajisüaka, Grade-IV mapa inyaker 114 indang basic pay agütsüba paid vouchers jungjunga reprangdangba nung sen talila agizükba sayua lir. Shitakba agibo iba mapang pay & allowances ji sen crore 34.13 asütsüla, saka crore 34.53 agizük aser ibaji sen lakh 39.28 talila agizükba liasü, ta CAG report nung shia lir.
September 2017 nung Commandant-i sen talila agizükbaji shitak ta ashi aser senji treasury ajanga sorkar account nung enoktsüogo ta metetdaktsü.
Iba onük atema CAG-i FIRs benoktsü, bangdak ketdangsertem anema disciplinary action agitsü aser State Vigilance Commission dangi ken o tem abentsü tebilemba shidangogo.
Sorkar department 7 nung DDOs 12-i sen auyazüka/talila agizüka agibaji DDOs aser TOs-i mapa meshitak inyakba sayur, ta CAG-isa metetdaktsü.