7th Pay Commission: August ita nungi itasen tur angutsüa akok

New Delhi, July 25 (Agencies): 7th Pay Commission-i itasen (basic pay) aser pension tutsütsü atema benokba Union Cabinet-i agizükba sülen tan hopta tsüngda Narendra Modi-i aniba sorkari iba dak sentakba sangdong ka agütsütsü akok.
Commission-i benokbatem rongnung sorkari itasen shilem 23.5 tutsütsü densema lir.
Iba tetuyuba agütsüra Central sorkar mapa inyaker million 4.8 aser pensioner million 5.2 itasen tan August ita nungi tur angutsü.
June 29, 2016 nü Union Cabinet-i AK Mathur-i aniba 7th Pay Commission-i benokbatem mapa küma inyaktsü atema agizüka liasü. Ajisüaka 7th Pay Commission-i allowance atema benokbatembo Finance Secretary-i aniba Committee kati reprangshitsü atema agütsüogo.
Iba Committee-i parnok mapaji mapang tatakzük ka nung tembanga inyaktsü aser ita pezü tsüngda report agütsütsü. Allowance dak sentakba tatembang telemtetba ka magi tashibo allowance ji tang tagutsüdak dang agütsütsü.
7th Pay Commission-i benokbatem ajanga sorkar mapa inyaker crore ka dak tema ajangzüktsü. Iba nungji Central sorkar mapa inyaker nisung lakh 47 aser pensioner lakh 53 lir. Item rongnungi Defence force nung inyaker nisung lakh 14 aser pensioner lakh 18 dena lir.
Sorkar mapa mezüngsüa inyaktsü tenzükertem indang tetenzükba itasen sen 7,000 nungi sen 18,000 kümdaktsütsü benoka liasü aser itasen timtiba sen 90,000 nungi sen lakh 2.5 kümtsütsü renemogo.