7th Pay Commission dak sendakba nung longkak ait

Imphal, October 26 (Agencies): 7th Pay Commission benoktsüba maparen menoba anema sorkar kübok department balala nung mapa inyakertemi mass Casual Leave agiba ajanga Bodhbarnü office tem timbaka lemtar liasü.
Old Secretariat nung longkaka aitba atema ploce temi nisung pogu puogo. Mass Casual Leave agitsüba sentong ya Manipur Government Services Federation-i ayongzükba sentong ka liasü.
Federation, General Secretary, L. Purujit-i ashiba agi, “Küm ka ser tesadangka tejakdang tanga state tem nung iba recommendations benokogo, saka Manipur sorkari tang tashi iba maparen mebenoki lir. Election matong tsüngda BJP puri parnoki sorkar kümtetra, 7th Pay Commission mapa küma inyaka atotsü, ta nangzüka liasü.”
Ajisüaka trade union ana Administrative Council-i parnokbo iba longkaka aitba sentong nung maden ta shiogo. Department kar nungi director temia, tanga mapang nung ama dang mapa inyakertem arua office nung denogo, ta ashi.
Deputy Chief Minister Y. Joykumar-i ashiba agi, “Sorkari 7th Pay Commission nung shia aliba ama mapa inyakertem nem itasen magütsütettsü, kechiyong itasen agütsütsü asoshi sen crore 1,200 nüngdaktsü.”
Manipur sorkar kübok tang tashi nung mapa inyaker parnok 84,000 lir.