8buba Nagaland Veteran Football championship April 6 nungi tenzüktsü

Phek, March 29 (TYO): 8buba Nagaland Veteran Football championship 2017, April 6 nungi tenzüka 10 tashi Phek nung asayatsü asoshi renema lir. Iba asayamong Phek District Veteran Football Association (PDVFA)-i achaayanga asayatsü.
PDVFA Press Secretary Kuzhovesa Soho aser Team Coach Nesahu Rhakho nungeri sangdong ka ajanga ashiba agi, Nagaland Veteran Football Association (NVFA) temzüng nung aliba ama arishi küm 45 teküpok asayar iba asayamong nung shilem agitsü asoshi memelatsü.
Iba ya bentettsü asoshi PDVFA puri asayar shia Aadhaar Card reprangtsü. Maneni Aadhaar Card malirtem iba asayamong nung shilem magidaktsütsü, ta parnokisa ashi.
Kasa sangdong nungsa, Phek Deputy Commissioner (DC) office nung Aadhaar card tailatem kanga junga asadangtsü. Asayamong nung shilem agitsüba telok nung tir, team manager, team coach aser asayartem ajaki pei indang Aadhaar Card photo copy kaka registration asüdang agütsütsü, asoshi metetdaktsü.
State ajunga mokdangba ajanga iba asayamong atsülanga aotsüsa aküm aser iaba atema sasa bilemer aser District ajak nungi asayartem arua iba asayamong nung shilem tajung agitsü asoshi pelashishia jaoker, ta ta PDVFA sangdong nungsa metetdaktsüogo.