9/11 atalokdang TV nung movie ka yoker ama bilem: Nikita Mikhalkov

November 27: 46buba International Film Festival of India nung ‘Lifetime Achievement Award’ angusang Russia nunger film yanglur, Nikita Mikhalkov-i, 9/11 nü kiralongrari US twin tower poksatsüba TV nung angudang movie yoker amai bilem, ta ashi.

Oscar- angusang-i, film nung raraba otsü aser osettem anguba ajanga nüburtem ajungmesor aser taküm atema kecha balaka sasa mebilem kümdaktsür, ta IANS dang ashi.

“9/11 lendong mezüng TV nung angudang film tajung kar yoker ta bilem, ajisüaka world ‘Breaking News’ angadangdangang iba noksaji movie masü shitakba ataloker ta meteta aru. Cinema ya kanga tashi tait aser cinema ajanga iba amala mapa inyaktsü ajungmesor,” ta Mikhalkov-i ashi.

“Film nung nisung meyirjang aika tepsetba angur saka shingaia sasa mebilemer. Iba jagi yimya ka ama kümdaktsür joko shitakba nung taküm ka samaba mesüra samatsüba kecha shishia mebilemtsür. Tanga tebilemba meüra tatalokba aika ajanga iba ama shisatsü adoker aser film ya item rongnungji ka lir,” ta pai ashi.

Pa India nunger film repranga intet. Iba mapang Raj Kapoor ya Russia nunger ajaki kanga sapua liasü aser pa tang tashi taküm ali ka asübo Russia Tir-a kümer lila.

“Pai dang mulung nungbo iba mapangji pa linük Tir-a kümer lila. Russian nung onok mapang India nunger film reprangtsü atema ticket alidak tesem nung nisung meyirjang aikasa senden,” ta pai ashi.