9buba Unification Day nung adentsü atema GPRN/NSCN-i jaoker

Dimapur, November 17 (TYO): 9buba Naga Unification anogomung November 22, 2016 nü Designated camp Khehoi nung amongtsü, aser iba sentong nung adentsü atema Tribal Hoho tem, GB tem, denomination balala nung tamangba tentettem, Mother’s Associations, kaketshir tentettem, Nagaland nung Naga nung masüba community associations, Naga social welfare associations, media groups aser Naga yimtenren temeten pusemer tentettem densema Nagaland nung tongti tentet ajak jaoker, ta Organising committee GPRN/NSCN, MIP-i sangdong ka ajanga metetdaktsü.
Chairman Gen. (Retd.) MB Neokpao Konyak aser Gen. Secretary, N Kitovi Zhimomi leniba kübok GPRN/NSCN-i jangjajanga, temetetba shisatsü aser nüngdakba ajanga Myanmar Naga lenirtemi Myanmar den aser Southern Naga lenirtemi India sorkar den yimjung ken o lenmang lapoka jembi tenzükogo, ajisüaka ibaji ajanga tang Nagaland nung aliba nüburtem taginüba aser yimtenren nükjidong mataloktsü, ta metetdaktsü.
GPRN/NSCN-isa, tesem telatetba makai Naga nungeri tenokdangba kecha makai pei temeten atema inyaktsüla, iba den külemi tang Nagaland nung aliba tribe temi yimtenren latettsü atema pei temeten amshitsüla, aser ibaji Myanmar Naga tesemtem aser Manipur nung tesemtem nung angur. Iba atemaji Nagaland nung aliba Naga nunger külemi lemteptsüla aser Naga nunger aliba tesem ajak nung nung teti atema yimtenren telatetba ka dangi arutsü asoshi lemteptsü nüngdak, ta MIP, GPRN/NSCN sangdong nungsa shia lir.