Temeli Mazüokba Lenirtem

Centre nung BJP lenirtemi o kanga mekümdangi jembibayong tawa BJP National Tir, Amit Shah-i Haryana Chief Minister Manohar Lal Khattar, Union Minister Mahesh Sharma, BJP MLA Sangeet Som, Sakshi Maharaj aser Sanjay Baliyan nunger jaoka tekümdangtsü o shia merenshiba sülen anogo pongunü tsüngda ano Union Home Minister Rajnath Singh-ia BJP lenir aser Union minister ana- V K Singh aser Kiren Rijiju nati o mekümdangi jembiba dak sentakba nung jembiogo. Tanü Rajnath-i, “Item oji tim mesüi mashiyimi ratet mesüra meyipshishi ta onoki ashiba ajanga onok jenbutsü makok. Onok tebilemba jembidang kanga kümdangshia jembitsüla. Sorkar abenba party nung lenirtem ama onoki o jembidang kanga kümdanga jembitsüla,” ta shiogo. Taoba mapang army tongti aser tang teinyakdak Union minister, VK Singh-i tawa mi agi rongseta asür taimaket Dalit nunger tanur ana shiruru (azü) den medemdanga jembiba indang osang anogo ananübuba osang channel ajak nung maneni sayudar. India ama nütsüng million aika aliba linük ka nung tongti lenir kati iba ama o jembiba ya kanga tamashi, ta bilemer. Tang linük nung mepetmesü jenti aliba tensa ka nung o kanga kümdanga jembiyonga mashiyimi ratettsü mela-melar, ibayongji tilartemia pei o kanga mita jembir anungji parnok ama bangdak lenirtembo kangasa shisadanga jembitsüla. Tang linük bangdakpurtemi linük rongsenkettsüng jenjang aintsü aser sensak tia nung alir million aika nem taküm jenjang tajungba agütsütsü asoshi kanga meranga inyakba mapang ka nung lenir kari o mekümdangi jembiba ajanga arok tenüng menüktsür. China densema linük aika rongsenkettsüng jenjang junga mainba mapang ka nung alima nung rongsenkettsüng jenjang kanga kara ainba linükji India lir ta aikati züngshir. Ajisüaka rongsenkettsüng ainba kijaji masü nüburtem tsüngda yimji-yimjung ali nungang linük aintsü aser azükarutsü, kechiyong alima linük aikati India nung senotsü jenti intoka shishilembatsü mulunga liaka linük nung tamangba lokti tsüngda tesempatep aser mepetmesü lira bendang linüktemi India dak merangloktsü aser tejak meyiptsü ana nung lir. Linük nung mepetmesü balala adoka kibong kar nungbo mangyim tia nung aliba mapang  ka nung pangdak lenirtemi “Lokti kati nisung tepsetbaji lendong ka dang” ta jembiba, “Muslim nungeri India nung linüra nashi shi machitsüla” ta jembiba, “Nashi tepsetertem tasüba agi merenshitsüla,” ta jembiba, Faridabad nung Dalit nunger tanur ana tepsetba dak sentakba nung “nisung kari azü dak lung agi aonba” ta shiruru den atishia jembiba aser “North India nungeri temzüng raksaba nung jangratem angur” ta nübur jenti mulungjang yirutsütsüsa jembiba otemji yimtenren lenirtemi jembiba o bo memesük. Pei temeli mazüokteter aser mepetmesü adoktsüsa mapang shia o mekümdangi jembirtemji ketdangsertem menden nung amentsü malang. Item ama lenirtem dang nungi nüburtemi kechi tajung imlatsü (?) ta arentaka bilemer. Ano külen asenok Khrista dak amangertemia anogo aben asenoki tebang temeli koda azüoker ta tasüngdangba ka arur. Nisung kati jembiba o ajanga pa mulungsentsü sayuba dang masü saka lendong mesüra temoatsü bener arur. Laishiba otsü nunga temeli mazüoki aser meshisadangi jembiba ajanga Jephthah-i tejashi tulu anguba, Herod Chubai meshisadangi jembiba ajanga Yohan Baptiba tekolak tangzükba asenoki angur. Tsüngremi meimchir yanglu, aser temeli-a yanglu, anungji Tsüngremi asenok nem iba temeli ya koda azüoka lidaktsüner, ibaji shisadanga Pai mulungba ama alitsü nüngdak. Asenok tebang temeli mita alitsü indang Laishiba nung reprangdangra, Tsüngremi asenok tiyazü jembiba nungi pilaa lidaktsüner, teyaksanga jembiba nungi, asüküm o jembiba, o talitabong jembiba, o meshisadangi kara/ilunga jembiba, tangar nüngsen jembiba, olulu prokba aser atakatem o jembiba nungi pilaa lidaktsüner. Shisatakar temeliji taneptsür ka, yimjung yanglur ka, taitoker ka aser Tsüngrem sentsüwangshidaktsür ka. Yakob 1:19 ajanga asenok dang, “Saka nisung shiai tangashitsu karang saka tejembitsu meilungi süang,” ta ashir. Atangji Tsüngremi meimchir nem tenarong ana agütsü saka tebangbo ka dang agütsübaji, angashitsü karatsü saka meilongi jembitsü asoshi südi.