Indo-Pak onük pei sasa bentettsüla: US

Washington, October 23 (Agencies): Pakistan linüki Pakistan-India tsüngda aliba mangatettep onüktem nung tasembuba party ka ama tiyongi aittsü mepishishia liasü ajisüaka Brihostibar nü US Tir Barack Obama’er administration-i iba temepishibaji magizüki, item onüktemji linük ana tsüngda pei sasa bentettsüla, ta shiogo.
US Tir Barack Obama-i kiralongrartem onük benokba sülen Pakistan Ato kilonser Nawaz Sharif-i kiralongrar telok, Lashkar-e-Taiba (LeT) aser parnok den adenba teloktem anema noktaktsü, kechiyong Pakistan aser tesem nung aliba linüktem atema item teloktem dak lendong keta lir, ta ashiba Obama’er ketdangsertem osang ajanga metetdaktsüogo.
Kashmir onük densema onük aika nung US tiyongtsüi aitsü Pakistan-i mepishi ajisüaka US Tiri, India aser Pakistan napronglai mulung nungang aji oda inyaktsü ta ashiba osang US ketdangser kati ashi.
Ketdangserisa, “Iba ya ajanga US mapatong nung kecha memelenshir ta ni metetdaktsüner. Iba ya linük anapronglai (Pak-India) linük ana tsüngda maneni inyaktsü mapatong ka lir,” ta ashi.
Ano külen Pakistan-i US dang kiralongrar telok, LeT aser parnok den adenba teloktem anema inyaktsü ta ashiba dak sentakba nung India-i, Pakistan-i US dang nangzükba ama inyaktsü imlar, ta shiogo.