Sorkari LED bulb crore 2 lema agütsü

New Delhi, Oct. 23 (Agencies): Narendra Modi-i aniba sorkari CFL mesüra incandescent bulb melena amshitsü atema LED bulb crore 2 lemtsüogo aser ibaji ajanga linük nung küm shia sen crore 1,000 kümzüktsü.
‘Domestic Efficient Lighting Programme’ (DELP) scheme kübok LED bulb alemtsü sentong ya Maharashtra, Rajasthan, Delhi, Uttar Pradesh aser Himachal Pradesh state tem nung Ato Kilonser Modi-i January ita nung tenzükja liasü. Iba scheme ya ajanga electric tashi kanga ajema atsükba nung yaritsü.
Iba scheme kübok Brihostibarnü (Oct 22) tashi nung LED bulb crore 2 dak tema lemtsüogo aser ibaji ajanga unit lakh 73 kümzükteta anogo nung sen crore 2.9 ajangzüktsü.
Iba sentong takok ngua inyaktetba ngua Philips company-i linük nung LED yangluba tesem lapoktsü tejangraba sayuogo. Sorkari 2018 tashi nung LED bulb crore 77 lemtsütsü sentong lir.
Iba bulb atsükba ajanga anogoshia kilowatt lakh 68 tashi kümzüktettsü.
“Tangbo tera dang nüngdakba ajanga bendanglen nungi mangaogo saka tangbo company ajaki parnoki yanguludi ta ashi,” ta power minister Piyush Goyal-i osangbener dang ashi.
Tang tashi nung Andhra Pradesh-i LED bulb timba amshidar. Parnoki LED bulb lakh 65, iba sülen Delhi nung lakh 34 aser Uttar Pradesh nung lakh 33 amshidar.
Linük nung Guntur, Andhra Pradesh nung aliba nüburtemi iba bulb timba amshi. Iba district nung LED bulb lakh 18.6 amshidar.
Goyal-i ashiba agi, taoba ita 7W bulb ka nung sen 310 asüba tangbo 9W bulb ka nung sen 73-i aluogo.
Sorkari ano iba bulb crore 10 mangatsü sentong lir, ta paisa shisem.