Asen kolok aser temulungjang

Asen dak temang telonglen tashidak lira, iba jagi tejak dena tobur mejungdaktsüba ama, asen kolok aser mulungsentsü nung tamajung bilemba lira, iba jagi asen jembishinü aser inyaksangshi yimya tobur mejungdaktsür. Aji oda, asen taküm yimya aser libaliro agi asen molungjang sayur. Ibayongji, Tenyar Pauli pa den külem tenzüker par medemer Tita ajungshia züludang, tajung bilemertem tsüngdangbo ajak tajung dang asütsü saka tamajung bilemertem tsüngdangbo ajak tamajung asütsü ta zülu. Asenoki ibaji Tita tapu 1 tekong 15 aser 16 nungji züngdangra yamai shia angutsü, ” Temerük purtem dangbo ajak temerük, saka memerükba purtem asoshibo kecha temerük maka, saka parnok kolok aser molungsentsü na prongla memerük. Parnoki Tsüngrem meteter ta nangzüker saka parnok mapa agi parnoki Pa menangzüker. Parnokji tesempatsü tashi manga aser mapa tajung ajak asoshi metemsü.” Iba Laishiba tekong nung ashiba Tsüngrem o ya jungjunga züngdanga bilemdangra, iba jagi asen mulungjang ateta atsüngtsü. Aji oda, iba o ya tangar dang masü saka asen dang ashir ama asenoki angatettsü. Iba jagi, Yisuia Luke 6 nung, pei nük nung aliba anak tama endoker külenang tangar nük nung aliba anak endoktsü indang shia lir. Tanü tensa asen taküm lokti nung liyonga aotsü asoshi ibaji kanga tongtibang asütsü. Asen taküm, asen kolok aser asen mulungjang ya temenen agi nembanga lir, iba jagi asenoki tangar dak tajung aliba mereprangtetter. Aji oda, kodang asenoki tangar dak tajung alibabo kecha mangur saka tamajung-tamajung dang reprangtetter ta südir, timtemji yang nung jagi tenzüker. Kinüngboi kinüngtsü dak tamajung-tamajung dang reprangtetter, yamaji kinüngtsüia kinungbo dak tajung kecha mereprangtetter ta asüba agi, ajak majung ser kibong raksaba aika lir. Aji oda, peisasa pei taibo mangur saka tangar tai dang angur ta asüba agi yimten aser lokti mesüngjemtetter. Ajisüaka, kodang asen shisatsü merüka lidir, aseni tangar asoshi tamajung mebilemtsü, tangar dak temulung malemba shisatsü malitsü aser tangar dak tai mebushitsü. Aji oda, asen mulungjang merüka lira asenoki tenük agi tangar dak tajung angutsü. Mathi 6:22 nung ashiba ama, asen tenük agi tangar dak tajung anguba ajanga asenok pelaa alir. Ibaji jangratemtsüka lir. Ajisüaka, nisung dak alima yimya ka lir aser aji, nisung shiai tangar-a pa mesüra la amaji dang bilemer. Anungji, nisung tamajung purtemi tangara pa ama mejungi alitsü ta bilemer aser tajungertemi tangara pa ama nisung tajung asütsü ta bilemer. Nisung tapu ana rongnungji asenoki tajungbaji shimteta shisatsü aser tekolok nung teti tajung bilema tangar dang benshitsübaji Khristan taküm ka asoshi kanga tongtibang asütsü. Khristan taküm ka asoshi pa mesüra la kija kümzüker lokti nungi pilar kija alitsübaji masü saka pa dak tajung aliba jagi tangar mulung sangwadaktsütsüla. Tanü asenok Khristan purtem dak tangar metsüdaktsüsa aliba tashimait tulutibaji, Tita kaket nung shia aliba ama, asenoki Tsüngrembo metet saka asenok mapabo Tsüngrem memetetba purtem ama inyaker. Asenok ajak asoshi tekümdangtsüji aji lir. Asenoki tangar anema tamajung mebilemtsüla, kechiyong tangar anema tamajung bilema asenoki Tsüngrem temeim indang mejembitettsü  aser tangar denji meputeptettsü. Aji oda, asenok kolok aser molungjang nung tajung bilemdi asüyonga makokba timtem lira, ibaji Tsüngrem dang ashitsüla. Atangji, asenok karibo temulung nungbo tajung inyakner saka mapa agi mesayutetter ta alitsüa akok. Iba ama timtem aser shisaboluji lira, tenyar Paul-i ashi ama, ibaji aseni masü saka asen dak aliba temenen agi inyaker aser asen dak  temenen ali tashi asenoki tangar dak tajung mangutsü aser asenok pelaa malitsü. Iba ama tebilemtsü agi na tonga lira, Tsüngrem dang asen kolok aser molungsentsü merüktetjang ta sarasademtsüla.