ACAUT-i ochimashi anema Dmr nungi Kma tashi jajatsü

Dimapur, October 24 (TYO): Tanü Nagaland ya ochimashi tulu nung songoka lir aser state sorkar nem item kuli agüjaka sorkari memulungba aser sorkari temulung magütsüba ajanga Nagaland state shirangba sayur aser ochimashi prokshir, ta tanü ACAUT Nagaland, Media Cell-i sangdong ka ajanga metetdaktsü.
Iba ama ochimashi sobaliba ajangshiba nung ACAUT Nagaland-i, court aser loktiliba nung asentenshi ajanga dang iba tashitak tera nungi atsütoktettsü ta bilemer; aji ta mesüra asen nüburtem ya pei sünütsü dang asüba telok ka kümadoktsü aser lokti tajung kaji, talangka pilar aliba pungmang ka dang asütsü.
Ochimashi sobaliba anema nokdaktsü lenmang rongnung kaji ajak nem metetdakja inyaktsü aser tim masüba ajanga mapa nung shimba jungkai adoka metetdaktsüba asütsü, ta ACAUT-i sangdong nung shia lir.
Tim masüba inyakyim ajanga mapa nung shima alirtem aser ketdangsertem tiaji court-i lemtettsü aser ibaji ochimashi anema raraba lenmang ka lir ta parnokisa ashi.
Oct. 30 aser 31 nü ACAUT Nagaland-i ayonga Dimapur (Chumukedima) nungi Kohima tashi “Walk Against Corruption” akatsü aser Raj Bhavan, Kohima nung Angh, BP Acharya nem temepishiba ka agüja tembangtsü, ta sangdong nungsa shia lir.
Iba jajaba sentong ya-a awareness campaign ka lir. Iba ya 2013 October 31 nü Dimapur nung lokti senden ayongzüka aliba sülen küm asem ajungba anogo den külemi amshir.
Kohima tashi “Walk Against Corruption” sentong nung ACAUT züngsem kar den ochimashi anema akhanga noktaker temulungertemi shilem agitsü.
Iba sentong ya Oct. 30 nü Chumukedima nungi tenzüktsü aser kasa anogo nung shilem agirtem Piphema nung anenzüktsü. Tasüngnü (Oct. 31) shilem agirtem maneni Kohima-i apusoa jajatsü. ACAUT Nagaland ya nüburtem movement ta temulung nung yur, Kohima nungia temulungertem Kohima War Cemetary tesem nung adenshia atar tesüsabuba Raj Bhavan-i aoba nung shilem agitettsü, ta ACAUT Nagaland, Media Cell sangdong ajangasa metetdaktsü.

Iba sentong ya Oct. 30 nü Chumukedima nungi tenzüktsü aser kasa anogo nung shilem agirtem Piphema nung anenzüktsü. Tasüngnü (Oct. 31) shilem agirtem maneni Kohima-i apusoa jajatsü. ACAUT Nagaland ya nüburtem movement ta temulung nung yur, Kohima nungia temulungertem Kohima War Cemetary tesem nung adenshia atar tesüsabuba Raj Bhavan-i aoba nung shilem agitettsü, ta ACAUT Nagaland, Media Cell sangdong ajangasa metetdaktsü.