VK Singh dang wako tanak sayu

Kolkata, October 25 (Agencies): Tawa Faridabad nung Dalit nunger tanur ana mi agi rongseta südaktsüba dak sentakba nung Union Minister, VK Singh-i jembiba o ajanga mangatettep tulu adoka aliba mapang ka nung Deobar nü pai zülu kaket ka sayatsüba mapang tamalen pai jembiba o nung pai jembitsü memelungi liasü, iba dak alia Left party-i pa dang wako tanak sayuogo.
Pai züluba kaket ‘Courage and Conviction’ Hindi oshi nung ‘Sahash aur Sankalp’ kaket West Bengal Angh, KN Tripathi-i sayatsüogo.
Dalit tanur ana tepsetba dak sentakba nung osangbenertemi asüngdangba ka langzüdang pai, “Ni kaket indang aser tsüngsang mepong indang dang jembitsü,” ta ashi.
Dalit tanur ana tepsetba onük nung tashishitsü akettsüsa pai jembiba o anema tanü nikongdang iba kaket sayaba sentong tembangba sülen Raj Bhavan kima lungkak aiter 60-i pa dang wako tanak sayuba den külemi “V K Singh na meyipa oang” ta ayimtena liasü.
Kaket sayatsüba sentong nung taoba mapang Uttar Pradesh Assembly Speaker aser tang WB Angh teinyaktak, Tripathi-i Singh tenüngsanga, taoba army tongti Singh-i pa jenjang aser menden mesükshii ajak ajungtsü atema inyaker, ta ashi.
Iba kaket sayatsü atema Singh Kolkata-i aruba mapang nungi tenzüka Left Front pusemertemi tesem balala aika nung pa dang wako tanak sayua lungkak aita liasü.
Tanep Singh Netaji Subhas Chandra Bose International Airport tonga aruba mapang Left Front pusemertemi pa dang wako tanak sayuba den külemi pa anema yimyim ayim.
Airport nungi osang ajanga ashiba agi, Left Front pusemer nisung 150 shii lungkak aitba ajanga Singh indang convoy ji lenmang nung sadema mesenzüteti liasü.
Left Party pusemertemisa Singh mesükba noksatem rongtok aser pa Cabinet menden nungi aludaktsütsüla ta takhangba agüja liasü.
Faridabad nung Dalit nunger tanur ana mi agi rongseta asüba onük nung Centre sorkar pusema jembidang Singh-i, “Nisung kari azü dak lung agi aonba tai ajak sorkar nem metongloktsütsüla,” ta Dalit tanurtemji azü den medemdanga jembiba ajanga mangatettep tulu adoka party aikati pa aitsüogo.