Oklahoma gari lendong nung pezü asü

Stillwater, Oklahoma nung Oklahoma State University parade sentong akadang gari kati sentepa aliba telok dak ia tsüoka yirutsürtem, anasa alirtemi yariba noksa nung angur. Iba lendong nung nisüng pezü asü.

New York , October 25 (Agencies): US university parade akaba mapang tetsür kati aniba gari ka telok sendena alidaki tsüoka ia India tsür kaketshir ka dena nisung pezü tsükset aser nisung 40 dak tema yirutsü. Gari anilaji yi agi mesepa jemer liasü südi ta tamang makai bilemer.
Tain asembo lendong atalokba tesem nungjisa süadok aser arishi küm 2 tanur kabo mozü ki tonger ang asü, ta Stillwater police sangdong ka ajanga metetdaktsü.
India nunger kaketshirlaji Mumbai nungi Nikita Nakal lir ta University of Central Oklahoma (UCO) nung Tir Don Betz-i jangjatsüogo.
Yimti nung ketdangsertemi gari anilaji arishi küm 25 tain, Adacia Avery Chambers lir ta jangjaogo aser la yi jemer gari ani ta mulung melemi pua lir.
Chambers-i Oklahoma State University parade sentong akatsü atema lenmang nokdanga aliba tsükpoka aiter lokti sentepa alidak oa tsüok, ta police-i ashi.
Ponca City, Oklahoma nungi Megan Lantz-i, “Iba gariji gondha nung kilometre 72 nungi 80 tashi kara arur (72-80 kph) nisung 100 shi nokdaka alidaki tsüoka ai, ta Oklahoma osangkaket den jembidang ashi.
Stillwater City Council aser yimti nung tekolakla, Gina Noble-i, “Iba ajungben tatalokba ajanga onok temulung kanga raksaogo. Asür aser teyirur kibongtem asoshi onoki sarasademtsür,” ta ashi.
Police-i ashiba agi, teyirur rongnung nisung ti tashi tasü taküm tsüngda lir, nisung toku kanga mejungi yirur lir aser nisung 17 terara yirur lir.
Teyirur rongnung karbo tanura lir, ta parnokisa ashi.
University of Central Oklahoma website ajanga Tir, Don Betz-i asür Nikita Nakal’er kibong den asüko lemsatepogo.
Tir, Betz-i, “Tasür rongnung India nungi Nikita Nakal-a densema liasü aser la ya UCO nung NBA tezüngdak liasü,” ta sangdong ka ajanga metetdaktsü.
Pai, “Kaketshirtem Central Oklahoma university-i nükjidong balala yur arur aser Nikita-a yamaji nükjidong ka aliyongang iba university yagi aru,” ta ashi.
University-i Nakal nem tetushi aser akümtsübu agütsütsü sentong lir, ta paisa shisem.