WW I mapang British nungeri India nunger tanurtem shimok

London, October 25 (Agencies): World War I mapang Western Front nung Germany anema raratsü atema British sepaitem rongnung India nunger tanur arishi küm 10 pur tashia shimoka liasü, ta iba rara nung India nunger sepaitemi shilem agiba indang kaket tasen ka ajanga shiogo.
Rara nung yaridaktsütsü atema talanglen aliba British yimli nungi tanurtemji rong ajanga France-i anir ao, ajisüaka tongti raraba tesem anasa tashi anir aoba ajanga aika yiru aser mozükidang amung, ta ‘For King and Another Country: Indian Soldiers on the Western Front 1914-18’ kaket ajanga ashir.
Kaketzülur aser puti otsü zülur, Shrabani Basu-i National Archives & British Library nung aliba official tezülubatem nung ajemdaker iba kaket ya zülu.
India nunger arishi küm 10 “bellows blower” ka aser arishi küm 12 groom ana densema India nunger tanur kari cavalry regiments nungita yari, ta ‘Sunday Times’ osang ajanga ashi.
Tanobur rongnung arishi küm 16 “brave little Gurkha” shiba dang Pim ta ajar, pa Brighton nung aliba hospital ka nung amungdang Queen Mary-i pai tasüita raraba atema award agütsü.
Item tanurtemji timbaka sensaker kibongtem nungi asütsü südi aser India nung aliba recruitment office nung parnoki arishi küm tiyazü ashi südi, ta Basu-i bilemer. Item office nung ita sen sen 11 agütsütsü ta shia parnok ajungshia liasü.
“Arishi küm 10 süra, ibajibo kangasa tanur, ibaji tejangja,” ta lai osangkaket ka dang ashi.
Secretary of State for War, Lord Kitchener dangi yokba shidi ka nungbo yirua aliba India nunger sepaitem achayangtsü atema lemzüktsüba Civil Servant, Sir Walter Lawrence-i, “Tanurtembo Europe-i arutsü memelatsüla ser nung melaogo, iba ya kangasa temeimtsüka,” ta shia lir.
Alima rangben mezüng rara nung India nunger sepai million 1.5 shii British nunger atema raratsüogo aser kar nem dang Victoria Cross bravery medal agüja liasü.
Basu indang kaketji November 5 nü Bloomsbury-i publish sütsütsü. Iba kaket ajangasa, British nunger nurse temi India nunger sepaitembo yaritsü memelaba indang jungkai adoktsür.