Lendong asoshi renema maliba

Dimapur nung balaka mapang-mapang shia mi lendong ataloker aser iba ama lendong atalokdangji teyari agütsütettsüsa renema maliba maparen aika reprangtetter. Iba jagi balaka lendong tuluka matalokdang nokdangtettsüba agi menokdangtet takoksa tulu angur. Nisung taküm lia atalokba aser ajuruba lendongtem rongnung tulutibaji kitsük kirong lendong ya asütsü. Ki rongdokbaji nisung ka mesüra kibong ka akaba rongsen ajak rongdoker, anungji ano alima nung kecha maka ser tazüngla nung pei taküm aser kibong tenzükshitsüsa akümer. Iba ama lendongji ataloktsü ana nung lir saka asenoki renema matar. Ibaji asenoki pei agitsü nung onsara tagitsü aitba ajanga lir. Ajisüaka, kodang asenoki asenok jakdang ataloktsüba alima lendongtem indang junga mebilemdangi asen kija agitsü aser ajangzüktsü indang bilema inyakdir, ibaji asenoksasa asenok ashitsü sang sotaka ayur amai asütsü. Aji oda, asenoki asenok kija agitsü bilemdang kitsük kirong nung amshitsü gari peria alia meyutetter, iba jagi army aser paramilitary purtemi meyarira asenok state meyong fire brigade garitem kija agibo majeter, idangji yim mesüra mepu ajunga rongdoktsüsa akümer. Ano, asenok ajaki shisabolua bilemtsüba lendong kaji, tanübo Dimapur aser Kohima ama nungbo longru agi atongtepa yangluba ki talang aika lir. Aji oda, item ama ki talang kolak nungji mi lendong atalok nungbo repranga rongdokdaktsütsüba dang asü mesüra ki talang kolakji tonga tuagi tzü kakettsütsüsa fire brigade garitem renema lir (?) Alima tejakleni aor asünungji joko yimtitem nung nisung teimba arua alir, anungji kiojen teimba-teimba yanglua aor. Iba ama nütsüng nübo den kiojen züinba mapang, maparen aika nung asenoki asenoksasa lendongi aitsüsa inyaker. Kari ayong aser kilentzü nokdanger ki asür, anungji tzünglu arudang motzü atsünger aser nempoka bener aor. Iba ama mesük lendongji asenok morumoru ajanga aiben ajurur. Aji oda, mi lendong ajuruba mapang Fire brigade garitem renemer mapang shitak nung lendong atalokba tesem bushia aruyonga gari tonga aotsüsa lenmang melira, parnoki asenok lendong nungi mekümzüktettsü. Iba kasaji mi lendong atalokdak aiben ataloker. Mi inseptsü gari nung tzü sünga bener arua lir saka lenmang maliba agi gari moutetter, anungji repranga lia, kümzüktettsüba  kitem dena rongdokdaktsür. Talisa, Dimapur nung ali jenjang tasak, anungji ali kiburtemi pei ki ajanga senzütsü asoshi ali sadema magütsüner. Iba jagi pei kima gari ana metsüiteptet kangshir. Iba jagi asenang tekangshiba kangshir ser nung asenok morumoru aser pei kija agitsü bilemba tenük agi item tekangshi aser timtemji mereprangtetter. Aji oda, sorkar nung tenzükertemia pei kija agitsü mebilemi yimkong ajungtsü bilema inyaktsüla aser nübortemia pei kija ajangzüktsü aser agitsü mebilemi yimkong ajungtsü asoshi bilema kong lidir liaka alitsüla. Tangbo asenok ajaki asen agitsü asoshi dang bilemer. Aji oda, ni karbo ojang, ozü tebok süngerbo ojang, onok anisüngzüka lira ojang ta bilemba agi asenok kibo tajung saka nübortembo sensaker, asenoki alima nung gari tajungtiba amshir saka lenmangbo alima nung tamajungtiba asütsüsaba tia nung yur lir. Tang amaisa asenok kija agitsü dang bilema alinungbo, kitsük kirong lendong nungi dang masü saka  asüng asen lima nung menoknok tulu anoktsüa akok, idangji asenoki asenoksasa mekümzüktettsü. Joko, asenoka tashitemetet agi tangar jenjang tonga tutetba kin asünungji, asenok temeket topur junga ayutsü bilemba den lendong timtem adokdang tangar teyarirtem asenok ki tonga sademsadema arutettsüsa gari lenmang alitsüla. Aji oda, kitsük kirong mapang amshiba garitema joko yimti nung ki talang tekolak tonga tur tzü yoktettsüsa renema alitsüla aser mi den raraba tialong nung tzü atai aotsüsa mesüi tzü bener aruba gari balaka alitsüla. Iba amaji sorkar o nübortem na pronglai lendongtsüdong mapang pei lima aser nübortem kümzüktettsüsa pei kija ajung masai yimkong ajungtsü bilema inyaktsüla.