China, Japan & S Korea lenirtemi tanaben senden amentsü: Chunying

Beijing, October 26 (Agencies): China, Japan aser South Korea lenirtemi S Korea nung senden ka amentsü renemba osang ka China Foreign Ministry otongdanger, Hua Chunying-i tanü Hombar nü metetdaktsüogo.

Par linüki asemi 2008 küm nungi tenzüka iba senden ya kümshi mena aru saka tesüiba mapang, World War Two (WWII) den sentakba mangatettep ken o kar adokba sülen iba senden ya 2012 küm nungi tenzüka memeni aru.

Par linük asemi tanaben senden amen tenzüktsü sentong renemba osang ya Chunying-i tanü Beijing yimti nung osangbener den ajurutepdang metetdaktsü saka iba senden amentsü anogo tejangjababo lai memetetdaktsü.

Ano külen, China Ato Kilonser, Li Keqiang-i S Korea semdangdang, taruba November ita 1 nü Seoul yimti nung iba sendenji amentsü renemba osang ka Japan sorkaria metetdaktsüogo.

Li-i tan October ita 31 nü nungi tenzüka taruba November ita 2 nü tashi S Korea semdangtsü sentong renema lir.

Ano külen, S Korea Tir, Park Geun-hye-i Li den tan October ita 31 nü Seoul yimti nung ajuruteptsü sentong renemba osang ka lar office-ia metetdaktsü saka Japan Ato Kilonser, Shinzo Abe-i Seoul kodang semdangtsü mesüra par linük asem lenirtemi sendenji kodang amentsü iba osang tejangjabo memetetdaktsü.

Par linük asemi senden tanaben amen tenzükshiba ajanga Japan den tanaben tesendaktep tajungba küma yanglushitettsü aser Northeast Asia nung tensa tajungba akümtsü imalaba olen ka Park-ia tan October ita tetenzüklen metetdakja lir.

Kidangsüa aliba linük asemi tesendaktep tajungba küma yanglushitsü aser par linük asem tsüngda senden tanaben amen tenzükshitsü nükjidong nung Japan, China aser S Korea foreign minister-temia taküm March ita senden amenba osanga jangjaogo.

Par linük asem lenirtemi tanaben senden amendang Japan mitkartemi WWII mapang tashiyim inyakba ken o benoktsü sentong renemba osang lemsatepba den külemi, par linük asem tsüngda rongsenren tesendaktepa tajungba küma yanglushitsü sentong aliba osang ka China’er Vice Foreign Minister, Liu Zhenmin-ia tanü metetdaktsüogo.

“Ozü linük asem tsüngda amalitep lia tesendaktep tajung lira, East Asia ajunga nung amaliteptsüren jungadoktsü,” ta pai ashi.

WWII mapang Japan mitkartemi tashiyim inyakba atema Japan lenirtemi sasa bilema taidok memeshiba atema Seoul o Beijing nati tanga nemjema lir aser ibaji ajanga par linük asem tsüngda tesendaktep junga meyuteti lir.

Ano külen, Abe-i 2012 küm November ita nungi tenzüka tanü tashi nung China Tir, Xi Jinping den anaben tashi ajurutepa lir saka pai Park denbo ken danga ajurutepa senden mena mali.