Dengue nokdangtsü lenmang ngutetogo

New York, October 26 (Agencies): Scientist temi dengue prokshiba ya merila dak aliba protein ka ajanga lir, ta putetogo. Anungji iba protein ji nokdangtsü asoshi mozü yangluba ajanga dengue nokdangtettsü.

Tang tashi nung dengue anepalutsü mesüra nokdaktsü mozü tejangja adoka mali aser alima rangben nung tajemba agi nisung billion ana shi iba shirang yagi kangshidar. Dengue virus (DENV) ya ‘Aedes mosquitoes’-i metepba ajanga menar.

“Tan ngutetba ajanga DENV tenzükba tali tajungba angatettsü aser ibaji ajanga iba mesen tepsettsü mesüra nokdangtsü asoshi mozü yangluba nung teyari angutsü, ta bushisüngdangertemi ashi.

University of South Carolina aser Central Michigan University nung aliba bushisüngdangertemi tesüiba mapang bushidangdang tongutetba aika nguteta liasü, ajisüaka ajak toktsür parnoki putative cysteine-rich venom protein (CRVP379) dak rangloker inyakyim tenzükogo.

Panoki ashiba agi, merila tem indang cell nung CRVP379 ali nungdang DENV menar. Merila dak CRVP379 aliba yari DENV tashi taitba akümer.

CRVP379 ya merila dak aliba ‘prohibitin’ ta ajaba protein den loktepba ajanga DENV prokshiba bushisüngdangertemi sayuogo.

Iba tongutetba ya ‘PLOS Pathogens’ kaket nung adoktsüogo.