Afghanistan nem mozü teyari agütsütsü nangzüker: EU

Kabul, July 14 (Agencies): Afghanistan nüburtem indang taküm jenjang tajungba kümdaktsütsü nükjidong nung Euro sen million 41 shi jenjang aketba mozü teyari Afghanistan nem agütsütsü tenangzükba ka European Union (EU)-i tanü Mongolbar nü metetdaktsüogo.

“Afghan Ministry of Public Health (MoPH)-i ketdang asüba System Enhancement for Health Action in Transition (SEHAT) mapatong ajanga Afghan nüburtem nem nungdakba mozümora agütsütsü nükjidong nung par linük nem sen million 41 jenjang aketba mozü teyari agütsütsü nangzüker,” ta tang Afghanistan semdanga aliba EU ketdangsertemi metetdaktsü.

MoPH-i Afghan nüburtem indang taküm jenjang tajungba kümdaktsütsü asoshi inyakba maparen tali tashi itshitsütsü nükjidong nung SEHAT mapatong ya tenzük ta parnoki ashi.

SEHAT mapatong kübok Afghanistan nung mozüki yanglutsü, kasaji ketdang asütsü aser mozüki balala nung nungdakba osettsüset tongtsütsü maparen inyaktsü renemba osang ka parnoki metetdaktsü.