Kohima nung gari ka angu, auer 4 apu & yi aika apu

Dimapur, October 26 (TYO) : October 24, 2015 nü Peducha beat post nung Kohima police-i Shaktiman gari ka anendaktsür mita reprangdang gari kaket aser engine number meputep aliba putet.
Shaktiman gari (No. MN-07C-4328) indang registration certificate nung aliba number aser engine number na meputep aliba putet aser iba jagi nisung ana apu. Tenaji Manipur nunger Laishram Mani Singh aser Sanasam Biren Singh na lir, ta Sub-Divisional Police Officer & PRO, Kohima-i sangdong ka nung metetdaktsü.
Tenaprongla police ket nung yua lir aser Sechü (Zubza) PS nung iba dak sendakba nung ken o ka benokogo, ta sangdong nungsa shia lir.
Kasa anogo nung Rachü Khel, Viswema nung lanurtemi auer pezü apu aser parnok ajak police ket nung agütsü, ta Kohima police-isa metetdaktsü.
Par pezü rongnung asemji Lahorijan yimer asür Gopal’er jabasotem Sobu, Sanjay aser Ato nungertem lir aser kaji ano tanur la lir. Parnok ajak anema Khuzama P.S nung ken o ka benokogo, ta sangdong nungsa shia lir.
October 23, 2015 nü 9th Assam Rifles-i garitem mita reprangdang Mahindra Bolero (B/R No. NL-06-2685) gari nung ozüngi memelaba yi bena alipa angu.
Iba gari nung yi bottle 536 bena liasü aser itemji, MC Rum (750 ml) bottle 248, OC Blue Whisky (180 ml) bottle 96 aser canned foster beer (500 ml) 192 nungertem liasü.
Iba dak sendakba nung nisung asem apu aser parnokji Duncan Colony, Dimapur nung alir Vinato Awomi, Burma Camp, Dimapur nung alir Kiheka Zhimomi aser Sewak Colony, Dimapur nung alir Atobo Achumi nungertem lir, ta Kohima police sangdong nungsa metetdaktsü.
Parnok ajak Chiephobozou PS ket nung agütsüogo aser NLTP Act kübok ken o ka benokogo, ta sangdong nungsa shia lir.