Ajurutepa sensaksemtsüla

Taoba honibar nü Ao Senso Telongjem Dimapuri ayongzüka, tang Nagaland Legislative Asembly nung temendak Aor yimsüsürtem den Dimapur aser temeket nung tenteta aliba Aor telongjemtem nungi lenirtem adenshia sensaksem akabaji kanga nüngdakba mapa ka rateta inyakogo ta bilemer. Atangji, mapang tajung majung ajak nung kin ka madak lenirtem rongnung shisalemsatepa alitsübaji kanga tongtibang lir. Nisung ajaki tajung dang bilemer saka ajurutepa mejembiba agi tamajung dang bilemer amai kati ka dak temulung melemi alitsüa akok. Aji oda, alima nung meputep adoka tsükchitepba ajak ya mezüngbo temulung melemtetba nungi tenzüker. Iba ama temenen nemji asenok mekokdaktsütsü asoshi mapang shia asenok ajurutepa shisalemsatepa alitsübaji kanga nüngdaker. Aiben asenoki lendong timtem ajurudang aser khuret tulu agi nennetdang dang ajurutepa tebilemtsü lemsateper. Iba jagi melamelaa akoktsüba tebilemtsü agi tebilemtsü tuluba küma odaktsür. Ajisüaka, shisalemsateptsüba yabo lendong timtem mapang masü saka mapang tajung nung ajurutepa shisalemsatepbasa tajungba. Lendong mapang ajurutepa shisalemsatepba agibo lendong timtemji anendaktsütsü asoshi dang jembitsü, anungji tarutsü anogotem nung nübortem junga lia aotsü asoshibo shisa tasen benoka mejembitetter. Ajisüaka, yimsüsür aser lenirtem mapaji tarutsü anogotem asoshi bilema anogo shia shisalemsatepa inyaktsübaji lir. Alima ya shisatsü (idea) agidang renlokdaktsür. Aji oda, tanü nübortem anisüngzüktsü asoshi inyakba mapa ajak ya nisungtem mulungjang nungi adokba shisatsü agi mapa küma inyakbatem lir. Aji oda, yimsüsür aser lenirtem ajurtepa shisalemsateptsübaji onük tejangja ka malitsüa akok saka kodang lenirtem ajurutepa jembidir, idangji tongtibang aser nüngdak onüktem aika benoka jembir. Iba tangatetba nung mapang mapang shia yimsüsür kati mesüra telok kati süngojemtsü renema yur sensaksemtsü jatepra, iba jagi nisungtem ajurutepdaktsür aser parnok rongnung shisalemsatepdaktsür. Tanü asenok ajak dak aketba tia majung shisatsü kaji yimsüsürtemi nübortem majuruner, anungji yimsüsür o nübortem na tsüngda tetsüngda talanga itta adoker. Iba jagi nübortemi yimsüsürtemi inyakba aser bilemba memetetter aser yimsüsürtemia nübortem tia jenjang memetetter. Shitakba agibo, yimsüsür o nübor naji apuani amai lir, anungji anogo shia shisalemsatepa alitsüla. Ajisüaka, yimsüsürtemi nübortem majurunübaji tim dang ta ashitsüsa  angatetter, kechiyong  nübortemi parnok ajurunübaji shisatsü ka lemsateptsü asoshi masü saka meshimetsütsü asoshi ajurutepner. Nübortemji tangar masü saka election nung sen chitsürtem to lir, anungji election nung sen chitsür külenang ano sen aser mapa meshii arur ta yimsüsürtemi aiben jashia jembiba angazüker. Tanü asenok tensa tiaji aji lir. Yamaji yimsüsürtemi nübortem aitsür aser nübortemi yimsüsürtem aitsür, saka shinga temeten mangur. Iba amaji kati ka aitsütepa küm pezü süidaktsür küm pongobuba nung election nung dang ajurutepner, anungji kasa sobaliba tamajung to amshitsü tenzüker. Item sobaliba tamajungtem ajakji anendaktsür sobaliba tajung ka tenzüktsü asoshi yimsüsürtem o lenirtem na aser nübortem o yimsüsürtem na teti ajurutepa sensaksemtsü nüngdaker. Nübortemi angatettsüba kaji yimsüsürtemji tsüngrem masü anungji parnoka shisatsü agi anünga lir, anungji asenoki parnokji shisatsü agi yaritsüla. Iba kasaji yimsüsürtemia parnokji tsüngrem masü anungji nübortem dang nungi shisatsü agitsüla ta rajemtsüla. Talisa, tanü tensa asenok asoshi rongdak nüngdakji yimsüsür, lenirtem aser nübortem rongnung ajurutepa shisalemsateptsübaji asütsü. Iba jagi shisa arentsü aser shisatsü agidang yimten nung telemtetba shitak agitettsü aser shisatsü agidang terenlok mapa inyaka otettsü. Tanü asenoki sen sen dang bushiba agi sen mangur saka shisatsü bushira sen yanglutettsü. Iba shisatsüji külemi ajurutepa sensaksem nung dang ngutettsü.