October 31 nü Miss Mkg 2015 sub-titles shimtsü

Mokokchung, October 28 (TYO): Miss Mokokchung 2015 sentong dak sentakba nung taoba hopta nungi tenzüka grooming maparen takok ngua agidaki. Taküm Miss Mokokchung atema tokteper ajak agi kongrular parnok terka (11 contestants) lir.
Hopta piyong shisalen sayur takutettem ajanga jembishinü, jaja wain, jakla, awashi, libaliro, temang anema ayuba, taküm nung mapa shimba nung teyari (career guidance & counselling), tetsür ka dak akettsüba noklem aser tetsür ka tobur junga anepaluyim item onük balala nung ajemdaker shisa jenti agüja arudaki.
Taküm Miss Mokokchung sentongji ‘Nurturing oneself’ omen dak rangloker November 6 aonung 5:00 ako nungi tenzüka Mokokchung town hall nung ayongzüka lir. Jangratemtsü kaji taküm iba sentong Toshizen-i choreograph asütsü.
Iba dak sentakba nung sub-titles shimba (fanning out) sentong October 31 Honibarnü agitsü aser iba sentong nungji sub-titles item nungi shimtsü; Miss Congeniality, Miss Healthy Skin, Miss Photogenic, Miss Beautiful Body, Miss Ethnic Wear, Miss Vivacious aser iba denji ano “Special sub-title” ta ser tetoktepertemi lokti mapa inyakba nungi repranger agütsütsü.
Shilem agirtem nem taküm yimya, awashi aser libaliro sayutsübaji kanga tongtibang, kechiyong tanü putu nung tetsür kaji tema tobur ajungba kisüng masü saka mulungsentsüjia ajungtsü tim, iba ajanga dang tetsür kaji lokti nung tetongokdak akatsü Mokokchung Art & Aesthetic Management (MAAM) nükjidong lir.
Taküm Miss Mokokchung nung takoker nem senpet sen den ano meimlaba senpetlep renemja lir aser takokertem nem T.K Skills reju nung küm ka fashion technology course ka agütsütsü ta tayongeri metetdaktsüogo.
Taküm miss Mokokchung sentongji Mokokchung Art & Aesthetic Management (MAAM) teloki Mokokchung town küm 125 quasquicentennial nüngtem balaka ayongzüktsü asoshi terenemshiba tulu lir.
Tejangrartem asoshi ticket item dokantem; IT Enterprise (Near FAC Bus Stand), La Store (Opp Allahabad Bank), Greeting Craft, Aier Bakery nung angutsü. Miss Mokokchung sentong dak sentakba nung kari tanga osang tejang metetnüra; 9862232686 / 9436006510/7085285059 nung tongteprateptsü akok.