Pak-i kiralongrartem yari : Musharraf

Lahore (Pakistan), October 28 (Agencies): Interview ka agiba mapang taoba Pakistan Tir, Pervez Musharraf-i, Kashmir nung kiralongraba mapa inyaktsü atema 1990s mapang nung Pakistan-i Lashkar-e-Taiba (LeT) telok ama training agir aliba kiralongrar teloktem nungita yariogo, ta jungkai adoka ashi.
Taoba mapang Pakistan army tongti, Mushraff-isa, iba mapang nungji Hafiz Saeed aser Zakiur Rehman Lakhvi na ama Lashkar lenirtemji nokinketertem jenjang nung jangratema nüngtugusa liogo, ta ashi.
Deobar nü Pakistani news channel Dunya News den jembidang Musharraf-i, “1990s mapang nung, Kashmir nung nüjiso atema rara tenzük. Iba mapang nungji Lashkar-e-Taiba aser tanga tentet 11-12 shi tenteta liasü. Onoki parnok nungita yari aser parnok nem training agütsü, kechiyong parnoki Kashmir nung parnok taküm bendanga agütsür rara,” ta ashi.
2008 küm Mumbai amakba sentong asameyanger tongti Saeed aser Lakhvi na dak sentakba tasüngdangba ka langzüdang pai item o jembia liasü.
Saeed ya India-i kanga bushia alir rongnung densema lir aser tang pa Pakistan nung sadok-sadoka senzüdar. November 26, 2008 nü Mumbai amakdang nisung 166 tepsetba ken o nung Lakhvi den nisung trok anema ken o benoka lir. Ajisüaka taküm küm tetenzüklen Pakistan nung court kati Lakhvi nem bail agütsüba anema India nung lungkak sashia aita liasü.
Sharif-isa, “Iba mapang nungji Hafiz Saeed aser Lakhvi na densema Kashmiri nüjiso atema raratemji onok atema nüngtugu nokinketertem liasü. Iba sülen telungpur rara nungi kiralongraba akum. Tangbo parnoki (Pakistan nung kiralongrartem) pei nüburtem tepseter. Iba ya azüoktsüla aser nokdangtsüla,” ta ashi.
Saeed aser Lakhvi nata azüoka nokdangtsüla asü (?) ta asüngdangba langzüdang Musharraf-i, “Kecha melangzütsü” ta ashi.
Musharraf-isa, tamangba yimsü nung ajemdaker raraba ya Pakistan-i tenzük, koba ajanga Soviet sepaitem anema raratsü atema alima ajaklen nungi telungpurtem longjem, ta ashi.
“Onoki Taliban nem training agütsüba sülen Russia anema raratsü yok. Iba mapang nungji Taliban, Haqqani, Osama Bin Laden aser Zawahiri nunger ya onok atema nüngtugu nokinketertem liasü. Tesülen parnok nisung tamajungertem aküm,” ta paisa shisem.