Saudi nunger Badawi nem 2015 Humans Rights Prize agütsür

Strasbourg, October 29 (Agencies): European Parliament (EP)-i 2015 Sakharov Prize Saudi Arabia nunger Raif Badawi nem agütsütsü renemba osang ka tanü Brehostibar nü metetdaktsüogo.

Muslim lenirtem mezüngmeshiba ken o nung aitsüba sülen tareptsü lisü agi 1000 ben areptsü temerenshi agüja aliba den külemi, tepuokdak küm 10 tashi puoktsü obendang agütsüba sülen Badawi tang Saudi tepuokak puoka aliba yong pai pa nem agütsüba sempetji tsüngdong magizüktettsüsa tia aliba osang jangjaogo.

“Badawi nem agütsüba temerenshiji temerenshi rong nung tesashitiba lir. Badawi-i pa nem agütsütsü renemba sempet agizüktsü asoshi Strasbourg yimti-i taküm December ita arutettsüsa pa dang taidoka pa tepuokdak nungi chioktsü asoshi Saudi chuba den lemsatepogo,” ta Badawi shimba osang sangoktsüba sülen EP Tir, Martin Schulz-i tanü metetdaktsü.

Online ajanga yimtenren aser tamangba yimsü den sentakba olemteptsü sabang renemtsütsü nükjidong nung Badawi-i website ka tentetba sülen Saudi sorkari pa 2012 küm apu.

Tesülen, Islam tamangba yimsü mezüngmeshiba ken o nung okadaki Badawi aitsüba sülen pa tepuokdak küm 10 tashi puoka ayutsü temerenshi agütsüba den külemi, pa nungi senjia dollar sen 266,000 achi.

Iba obendangji Saudi Supreme Court-ia taküm 2015 küm June ita agizüka lir.

Ano külen, Saudi sorkari tareptsü lisü agi 1000 ben areptsü asoshi Badawi nem agütsüba temerenshi agütsütsüren shilem mezüngbuba agia, Badawi dak yimjak nung tareptsü lisü agi 50 ben tashi taküm January ita arepba osanga jangjaogo.

Badawi tepuokdak puoka ayuba sülen pa kinüngtsü aser tanurtem tang Canada linük jenoka lir.

EP-i Soviet mapang nübur temeten asoshi nokdaksang, Andrei Sakharov nüngtem nung nübur temeten asoshi nokdakbapur tetemtsü nisung mesüra tentettem shima iba Sakharov Prize ya kümshi agütsür.