India-i küm pongu nung Africa nem US billion 10 aputsür

New Delhi nung 3buba India Africa Forum Summit 2015 mapang Ato kilonser Narendra Modi aser Africa nung aliba linüktem nungi lenirtem den külemi tangokba noksa ka angur. (New Delhi, October 29, 2015).

New Delhi, October 29 (Agencies): Tanü India-i taruba küm pongu nung Africa nem US sen billion 10 aputsütsü sangdongba den külemi senotsü teyari US sen million 600 agütsütsü sangdongogo.

Ato kilonser Narendra Modi-i Africa den kiralongraba anema raraba, climate change aser UN reforms nung amalitepa inyaktsü jembiogo.

New Delhi nung 3buba India-Africa Forum Summit (IAFS) senden nung jembidang Ato kilonser Modi-i, “Iba senden ya, ali meimchir shilem asem nung ka (Africa-India nütsüng) kilem ka kübok nükjidong yur amenba senden ka lir,” ta ashi.

Modi-isa, India nunger billion 1.25 aser Africa nunger billion 1.25 külemi ka kümer inyaker aser iba partnership ya nükjidong ka aser rongsenkettsüng tajangzük den alema lir, ta ashi.

Ato kilonseri, “Asen tesentaktep tashi taliba aittsü atema taruba küm pongu nung India-i US sen billion 10 aputsütsü,” ta sangdong.

Paisa, “Iba dak alia onoki senotsü teyari US sen billion 600 agütsütsü. Iba nung ya India-Africa Development Fund atema US sen million 100 aser India-Africa Health Fund atema US sen million 10 densema lir. Iba den külemi taruba küm pongu nung India nung scholarships 50,000 densema lir,” ta ashi.

UN Security Council reforms nung India aser Africa tesentaktep tali tashi ittsütsü atema ayongzüka Modi-i, tang alima nung yimtenren, rongsenkettsüng, technology aser security densema aisü nung kanga kera melenshia indar, ta ashi.

“Anungji Security Council densema United Nations reforms atema India aser Africa na ola ka ser jembitsüla,” ta ashi.

India-Africa Forum Summit (IAFS) senden nung Africa nung linük 54 nungi Tir 41 aser tongti ketdangsertem aika denogo.