Sen marur !

Tang Nagaland nung tejembidak o kaji center sorkar nungi sen maruba indang ya lir. Atangji, center nung Congress teloki aniba UPA sorkar melena BJP teloki aniba NDA sorkar arur külen tongtibang inyakyim ajak melenshia aoba ajanga tang ya akhi ama center sorkar nungi sen marur. Talisa, akhidang nungi taoba UPA sorkar tashi state shia atema terenlok mapa inyaktsü asoshi sen lemzüktsüba telok Planning Commission kenyongi anentsür, iba melena NITI Aayog melenba ajanga tang tashi NITI Aayog mapaji tenzüka moutetter, iba jagi state shia nem terenlok mapa inyaktsü asoshi sentongtem repranga senotsü melemzüktsütetter. Atangji, center sorkar nungi terenlok mapa inyaktsü asoshi sen meyokaka, tangar state-bo pei state sen agi terenlok mapa inyaka otetter , ajisüaka asenokbo sor küm 50 dak tali asenoksasa jajaa moutet center sorkar teka nung ammeter dang jajar asünungji, center sorkar tekaji chiokdokra jajaa moutetter.Tanü asenok tashi aser jenjangji ibaji lir. Aji oda, asenoki asenok tia ya jungjunga bilemdangra, akhidang Rip Van Winkle-bo küm 20 dang mejang saka asenokbo küm 50 dak tali mejanger asütsü. Tang yabo terenlok mapa inyaktsü sen meyokba dak alaka ita sen agütsütsü asoshibo yoker asünungji, iba jagi Naga nunger mayar aser kangabo timmatemer, kechiyong Naga nunger jenokdakji sorkar ita sen ya dang lir. Aji oda, tang ama center sorkar nungi sen talubo meyoki anenba mapang, asenoki jungjunga bilemdangra, yashi tashi center sorkar nungi terenlok mapa inyaktsü aruba sen agi terenlok mapatembo meinyak ser küm shia sorkar senpong tazüng dang masü saka tagütsüba dang nungi talila endoker küm atemba asenoki ajangshia aruogo. Asenok jajatsüba lenmangbo meyanglu, yimdong nung street light mali, mozü kidang mozü mangur, school kidang tazünger mali, aluyimertem tenüng nung alumayimertemang teyari aser tajangzük agir, sensakertem asoshi aruba teyaritem tulur aser takartemiang dang agir, saka center sorkar nungi yokba sen dang nungibo sen crore meyirijang dak tali endoker küm aika temdaktsüogo. Aji oda, terenlok mapa inyaktsü asoshi aruba sen agi nübortem anisüngzüker masü saka nisung ishika takar akümer. Nagaland alijak nungbo terenlok mapa inyakba mong maka saka Delhi nungi aruba sen tobo meyipabo meyok ta asüba tetezüji kar keti item senji iadokogo. Itemji tanü kanga takar kümogo. Item sen jagi election nung tokteptsü. Asenok majungba agi asenok asoshi atakatem yokba mapa kaji nübortem sen auyaa electioni aibaji asütsü. Nübortem asoshi iba dang nungi tuluba mezüngmeshi mapa majurutsü. Tanübo, tia kar makaka center nungi sen meyoker asünungji, auyaner asoshia auyadak maka kanga timtema alitsü. Iba ama tia ka nung asenoki jungjunga bilemdangra, nisungtem timmetemiang asen lima meyanglushitettsü, anungji tang dang nungi timtatemba atemtsüla. Gari lenmang yaa tang dang nungi teraksaba raksar, apu dena chireper, ita sen dena mangutsüsa aküm nung dang asenoki asen lima yanglushitsü bilemtettsü. Iba tangatetba nung taoba hopta nung ” tang amai Nagaland atema center sorkar nungi ano küm ka, ita sen dak alaka, terenlok mapatem atema sen meyok nunga koma süla ?” ta asüba tasüngdangba nung bilemdangogo. Atangji, iba tasüngdangba yagi ‘jungla’ mesüra ‘ mejungla’ ta asüba telangzüba aginer masü saka center sorkar nungi teyari meyokyonga joko asenoka asenoksasa litettsüla ta asüba shisatsü ka lemsatepner. Asenok lima ya takar aser asen lima akaba ali rongsen ajak madak asenok kibur, anungji asenok mulungba nung amshitsü India temzüng arla 371(A) nung shia lir. Ajisüaka, takar lima nung asenoki asenoksasa sensaka alir. Ibaji asenok azümasenba agi mesüra tangar dak dang metaloka alitsü bilemba alar kolok adenba ajanga lir. Joko, asenokbo tangari yokba sen aru matali saka asenoksasa asen lima nung asenoki sen yangludi. Iba ama lima kaji yangertsü asoshi asenok lanurtemi akoktsü, ibaji shitakba akoktsü aser akoktsü.