VDB mendenpurji apu ama asütsüla

Kohima, October 29 (TYO): Nagaland Chief Minister, TR Zeliang-i Nagaland State Village Development Board (VDB) Association office ketdangpur dang state nung aliba yimtaklir o sorkar na tsüngda apu latsür ka ama asütsüla, ta ayongzük.
Tanü nikongdang CM kidang aliba office nung shisa lemsatepba mapang Chief Minister-i, VDB ketdangpurtemji tzüküm külen nungi külen tashi sentaktepba apu ka mesüka, yimtaklirtem nem sorkar project aruba metetdakja shisa tuyur kaka asütsüla, ta ashi.
Tir Tohoshe Awomi aser Tongti Tezülur Manthungo Kikon nati anir pa den ajurutepi arur VDB Association ketdangpur dang pai, “Yimtak alirtem ajakibo sorkar indang scheme aser project ajak memeteter mesüra junga mangateter, anungji item tajangzük ajak agitettsü asoshi nenoki parnok nem angatetdakja tetuyuba shitak agütsütsüla,” ta ashi.
“Yimtaklirtem makoksatsü meji sorkar nungi aruba schemes aser sentongtem kanga junga tendanga asadanga inyaktsüla,” ta Chief Minister-isa ashi.
Tazüng tashir lanurtemi VDB Association aniba ngua pelaba metetdaktsüdang pai, item lennirtem ajanga yimtak yimtsüng nung terenlok mapa inyakba ajak sorkar nem mapang shitak nung osang peria agütsütsü, ta kanga temulung lema ashi.
Chief Minister-i, “Tang India Sorkari Wokha, Longleng, Kiphire, Mon aser Tuensang nung agüja aliba ‘Backward Region Grant Fund’ mapatong ya memelenshitsü asoshi Centre dang kü tsütsü nungia mepishiogo,” ta ashi.
VDB ketdangpurtemi New Delhi nung tawa Rural Development Union Minister ajurua state nung terenlok mapa inyakbatem lemsatepogo aser yimtsüngtem nung terenlok mapa indang angashia la-a pela liasü.
Mapang talangka sota aliba senotsü RD department nem agütsüba ajanga yimtaklirtem kanga ajangzükogo ta parnoki Chief Minister den pelaba lemsatepogo.