Jembiba ama melitetter

Naga nunger asoshi Naga Students’ Federation (NSF) telok ya kanga tongtibang telok ka lir, kechiyong ibai Naga nunger kaketshirtem telongjem tentet tulutiba lir. NSF mapa yabo tang Nagaland state dang nungi tuluba, anungji kin kidong, oshi aser nütsünga Nagaland sorkar kübok aliba dang nungi kanga agia teimba lir. Aji oda, NSF tenzükertem mangdangji tang Nagaland state den alushi agi sendaktepa aliba  Naga nunger lushi aser item tesemtem nung aliba Naga nungertem ajak yimten ka kübok külemi alitsüla aser alima tsüngdang Naga nunger akümketa wangshiwangshia alitsüsa inyaktsü tangatetba liasü. Aji oda, lenirtem melentepa aruakasa NSF nükjidong aser mangdangjibo memelenshir, iba jagi NSF kübok Naga nunger kin ajak adentsü lenmang lapokja lir. Ajisüaka, tia maka kaji Nagaland nung aliba Naga nunger kintem rongnunga anüdoklen alir kintembo NSF nung madener. Ibaji Naga nunger ajak asoshi kanga takoksa lir. Atangji, Naga nunger kin kidong aser oshi tapu paikaya lokti telongjem ka kübok tzüa masen longjema alitsübaji tasak, ajisüaka Naga nunger ta asüba kin shiai Naga nunger telongjem ta asüba tentet ka kübokbosa longjema alitsüla. Iba tashi jagi dang Naga kin ya kin ka ama alima nung tangari meteta litettsü. Aji oda, tanü temang ka ser longjema melitetaka iba tangatetba aser mangdangji mesamai akok tashi Naga kintem ajurutepa aser putepa alitsü asoshi NSF lenirtemi maneni inyaktsüla. Yakanü October 29 nü NSF tenzüker küm 68 ajungbamong mongogo. Iba amongba sentong nung taoba aser tang NSF lenirtem rongnung jembitepba onük tongtibangtibaji NSF lenirtemi parnok lenir asüba mapang jembiba ama mapa nung aser taküm yimya nung sayuteta alitsüba nüngdak indang jembia liasü. Aikati, NSF nung inyakertembo India nunger election nung shilem magitsüla ta jembir. Ajia shitak, kechiyong NSF teloki jembibajibo India yimten indang masü Naga yimten indang jembir, anungji Naga nunger yimten nüjiso bushirtem den NSF nükjidongji kecha balaka tepila mali. Ajisüaka, NSF lenirtem asoshi NSF mapang temer yimten mapa nung amuoka inyakbajiang tongtibangtiba lir. Iba jagi NSF lenirtem aika state election nung tokteper aser takok angur. Tang Nagaland state sorkar nunga yimsüsürtem aika NSF lenir südangba nübortem lir. Item jagi teti NSF menungrar aser NSF mapang nung jembiba ama inyaktsü meranger. Ibaji NSF nung inyakdangertem asoshi tangar dang nungi talila abenba khuret ka asütsü. Aji oda, taoba NSF lenirtem shirnoksa sorkar nung yimsüsür kümer lir, parnoki danga NSF mapang nung nübortem meima ochishia inyaktsüla ta ayimtenba ola to mamai mapa küma inyaktsüla. Kasa yimsüsür süaka, NSF nung inyakdanger o meinyakdanger na tsüngdangji ochishia aser nendaka inyakba nung, shisatsü tasen agi sentong tasen yanglua inyakba nung aser nübortem nüngdak reprangteta inyakba nung tangari reprangtettsüsa inyaktsübaji khuret tulu lir. NSF nung lenir asüdangbo tangar tangar dang aija inyak saka tang kasa nisungji yimten nung alidang tangar dang nungibo pa-ang ochimashiba, mapa makokba aser nübortem tia mangtetba süra pabaji masü saka NSF tenüngmenüktsür asütsü. Shiba südir süang jembitsübo temela saka jembiba ama alitsü aser inyaktsü tasak. Ajisüaka, pei tetsü taso li meimertem asoshibo mapa tasak aser temela kecha mali, pei tetsü taso lima yangertsü asoshibo pei takoksa aser timtem arema inyaktsü. Tanü asen lima majungba ya NSF nung inyakertemi pei mapang nung jembiba ama meinyakba agi mesüra yimten, lokti aser arogo lenirtemi peii jembiba aser sayutsüngiba ama melitetba ajanga lir. Iba tashidak agi Naga nunger kangshir süra NSF nung inyakertemi danga pei agitsü rongsen mebushii nübortem asoshi bendanga agüja inyaklasang, manger sangwa nung Naga lima ya jungla ta bilemer. Tajung mesüra tamajung ataloktsüba ya telok nung jembir mataloker saka nisung ana jembiba aser nisung ana longjemba nungi adoker. Iba tangatetba nung NSF teloki Naga nunger alidak tonga-tonga oagi ajak den Naga nunger ka dang akümtsüba mangdangji maneni agütsütsüla. Ashiko, iba mangdangji tangsa tangbo mataloktsüa akok saka küm 50 sülenbo lanurtemi atalokdaktsütsüa akok.