US tsür, Biles-i Gymnastics World Championships otsü tasen yanglur

Glasgow, October 30 (Agencies): America tsür Simone Biles-i gymnastics world championships otsü tasen ka yashi Brehostibar nü yangluogo.
Biles-i yashi points 60.388 ngua külem sensotsür aser Olympic champion, Gabby Douglas den temaba jenjang ngua all-around shilem indang gold agizük.
Arishi küm 18 tain Biles-i tan gold agizükbaji densema all-around shilem indang gold medal kümsembuba atonga agizüker küma otsü tasenji yanglu.
Douglas-ia points 59.316 ngua silver aser Romania tsür Larisa Iordache-i 59.107 ngua bronze medal agizüka liasü.
Yashi gold agizükba densema, 2013 küm nungi tenzüka gymnastics sabang nung shilem agila, Biles-i tanü tashi nung worlds tetoktepba indang gold medal 8 tashi agizükba osang jangjaogo.
Ano, lai yashi takok anguba sülen Biles-i sangküm 2016 küm asayatsü ayongba Rio Olympics nunga shilem agitsü jenjang tajung nguogo.