US Secretary of State, John Kerry-i Central Asia semdanger

US Secretary of State, John Kerry (Tiyongtsü, Abelen)-i tanü Honibar nü Kyrgyzstan yimtiba, Bishkek kübok Manas International Airport tonga aoba sülen Kyrgyzstan Foreign Minister, Erlan Abdyldaev den ajurutepba noksa nung angur. (Bishkek, October 31)

Washington, October 31 (Agencies): US Secretary of State, John Kerry-i Central Asia kübok densemba linük 5 semdangtsüren tenzüka Kyrgyzstan yimtiba, Bishkek tanü Honibar nü tonga ogo.
Kerry-i tanü Kyrgyzstan semdangba sülen taruba anogo 4 nung Uzbekistan, Kazakhstan, Tajikistan aser Turkmenistan linüktema semdangtsü sentong renema lir.
Pai linüktemji semdanga par lenirtem den ajurutepdang par sorkartemi nübur temeten anema inyakba aser nübur nem pei tebilemba lemsateptsü temeten magütsüi nokdanga ayuba onüktem benoka jembitsü asoshi nübur temeten asoshi nokdakba tongti teloktemi Kerry ajungshia lir.
Aji oda, Kerry-i tanü Bishkek yimti tonga aoba sülen Kyrgyzstan Tir, Almazbek Atambayev aser Kyrgyzstan Foreign Minister, Abdyldaev Erlan Bekeshovich na den ajurutepa liasü.
US-i par mitkar ajunga Afghanistan nungi anitetadokba ajanga Washington-i parnok den den joko amalitep malitsü ta Afghanistan den kidangsüa aliba Central Asia linüktemi tang tebilemtsü khuret benoka lir.
Alima tashi abenba linüktemi kidangsüa aliba Russia linük anema tenokdangba sentong benokba den külemi, par region nung tutetba totzü yokshitsüren jenjang tang kanga mejungi akümba yong Central Asia linük 5 indang rongsenren jenjang tang kanga mejungi akümba osang jangjaogo.
Kerry-i tanü Kyrgyzstan semdangba sülen asüng, Deobar nü Uzbekistan semdangtsü sentong renema lir.