Tepelatsü mapang

Asenok anema alidang, kaa itta alidang, takok angudang aser tangari asenok asang dang asenok pelar. Itemji meimchir ajaki ajangshiba tepela lir. Ajisüaka, item tepela mapangjibo teti atema masü saka mapang tatsüka, anogo, ita aser küm ishika asoshi dang lir. Anema alidang pelabajibo shirangdang oa adoktsü, senotsü aser jangotsü akadang pelabajia makaba mapangbo samatsü, takok angudang pelabajia tamakok angunübo jashitsü aser tangari asang dang pelabajia tangari nüngsen jembitsünübo mepelatsü. Item tepela aser tejashi ajakji alima nung alir ajaki ajangshir. Ajisüaka, taküm aser mapang tajung nung dang pelaba tepela dang nungi tajungba, tuluba, temaba aser tashi taitba tepela ka lir. Iba tepelabaji Khristan taküm ka dak aliba tepela lir. Khristan taküm ka dak aliba tepela yabo temang anema aliba agi anguba tepela masü, senotsü akaba agi pelaba tepela masü aser tangari tenüngsang agütsü dang anguba tepela masü, saka tematiba Tsüngrem nungi anguba tepela lir. Iba tepela yabo asen taküm nung kechisarina tajung aser tamajung atalokba agi aotsü aser arutsü makok. Chichiba Khristan taküm ka nung tepelabaji Tsüngrem temeim, taochi aser Pa tashi metetba ajanga arur aser taküm nung kechi tia ajurudir ajuruaka Tsüngrem nungi pila-a moi Pa den longjema aliba ajanga angur. Tsüngrem nungi anguba tepela tulutibaji Pai asenok menen ajak doker külenang ano asenok teti tepeladak alitsüsa ki renemer asenok anii arutsübaji lir. Iba tepelatsü osang tajungji asenoki Laishiba Yohan 14:3 nung angur. Asenok taküm nung kechi tensa tia ajurudir ajuruaka, iba ochi o aser teimlaji raksatsü makoktsü. Iba tamang aser teimla nung Yisu dak amanger Khristan-tem pelar. Laishiba nung timtem aser lendong mapang tetsübu aser shisabolu kokteta Tsüngrem dak amangba aser pelaba nisung taküm otsü aika lir. Item rongnungji tanü asenoki kanga lendong aser timtem tulu nung aliba mapanga tetsübu aser tejashi kokteta pelapelaa Tsüngrem nüngsang ken tena aliba Khristan taküm ana reprangdangdi. Tenaji Tsüngrem tenyar Paul aser Sila. Tenyar Mapa 16 : 25 nung ashir, ” Ayaterem nung (tsüngden chiokdak) Paul aser Sila Tsüngrem dang sarasademya aser Pa nüngsang ken tenya liasü, aser tepuokdak alirtemi item sarasadem aser kentenba olaji angaa liasü.” Iba mapang Paul aser Sila na ya nisung tsütsü bilemdangdi süra, ken atentsüsaba tia nung mali asü. Tena ya jungjunga züker, tepuokdak yinzü agi tetsüng alener tammang dak takdang ka nung yua liasü. Tena tiaji tejashitsüka, saka iba tejashitsü  tia tamajung jagia tena dak aliba tepelaji meremsemtet. Tsüngden chiokdak amang nung tenati sarasadem aser tepela nung ken aten . Idangji, Tsüngremi iba tepuokdak sayatenya mapa tulu inyak. Menoknok tulu anok aser tepuokdak kimong ajak anokshi. Idangyongjisa tepuokdak kishi ajak lapok aser tepuokertem alena aliba yinzütem ajak parnoksasa salaadok. Itemji tesüngmangtsüka ! Ajisüka, tanü asenok atemabo item sayatenya mapatem dang nungi tesüngmangtsü tulutibajibo tangari temang mena züker, tsüngden chiokdak amang nung Paul aser Sila nati Tsüngrem tenüngsang ken atenbaji lir. Ibaji kecha agia masü saka parnokji chichiba Yisu dak amangertem liasü. Tena  dak tanüla temeshi agi sünga alibayong tenati ajuruba tensa tia tamajung agi tena tepelaji mesamadaktsü. Alima nung alir asünungji, asenoka kenü ama dangbo malitsü. Kenünü makamait tia ajurutsü, kenünü shilumanem tia ajurutsü, kenünübo tangari maksütsütsü aser asen dak tai mali ser nung asen jashitsüsa aitsütsü. Ajisüaka, item tensa mapang tamajungtem nemji asenok mulung nung tepela ayong ama yima alibaji merosepdaktsütsüla. Asenok taküm ya Tsüngrem tanülai anishitettsüsa, asenok indangindanga ochishia alitsüla. Aji süra, kechi tia nung lidir liaka, ken nung atenba ama, asenok ajaki Tsüngrem dang pelapelaa “Kü den ya junga lir” ta tentettsü.