Egypt nung Russia Airliner tsüokba lendong nung 224 prong asü

Cairo (Egypt), October 31 (Agencies): Tanü Russia nunger tayimtsü ka nung passenger 217 aser tayimtsü anir den ketdangser 7 mener Egypt, Sinai peninsula nung tsüokogo, ta Egypt sorkari osang ka ajanga jangjatsüogo.
Iba lendong nung nisung shinga  mekümzük, ta Russian embassy osang ajanga ashi.
Egyptian aviation ketdangser kati ashiba agi, tayimtsü pilot jagi tayimtsü nung technical timtem kar adokba osang metetdaktsüba den külemi anasatiba aliba airport nung tayimtsü anentsü asüngdangba sülenbo tongtepratep mesüteti aküm.
Tang tashi nung search & rescue-i tayimtsü teraksa nungi tanur densema tasümang 100 ngutetogo. Tayimtsüji ana küma pakdanga tesülen shilem tila ka arong aser shilem tulubaji lung tulu ka nung atsük. Iba tesem nungjagi onoki tasümang 100 dak tema ngutetogo,” ta ketdangserisa ashi.
“Tayimtsü nung passenger tem aliba section ka lir aser yangji ola kar angashiba sülen rescue team-i telung jagi ia akümlir angutsü imlar,” ta tamalen rescue team ketdangser kati shia liasü.
Ajisüaka Egypt ketdangsertemibo, iba lendong nung nisung shinga mekümzük ta ashiba osangbenertemi sangdongogo.
Egyptian Civil Aviation Minister, Mohamed Hossam Kemal-i, “iba tatalokba kuli jangjatsü ano kanga karara,” ta ashi.
Iba lendong atalokba sülen Egypt Ato kilonser den tourism minister aser health minister temi lendong atalokba tesemji semdangba sülen Russian ambassador den asüko osang lemsatepogo, ta sorkar sangdong ka ajanga ashi.
Metrojet (taoba mapang Kolavia Airlines ta ajaba) tayimtsüji Russian company kati acha ayanger.
Osang ajanga ashiba agi, Russia-i aoba Flight 7K9268 ji Egypt nung Sharm al-Sheikh nungi apusoba sülen minute 23 nung radar samatok.
Interfax news agency den jembidang Russian aviation agency Rosaviatsia nungi ketdangser Sergei Lzvolsky-i, iba tayimtsüji Egypt, Red Sea resort jila, Sharm el-Sheikh nungi   anepdang 5:51 ako (par mapang) nung apusoa liasü.
Iba tayimtsü nung passenger timbaka Russia nunger raliwalirtem asütsü ta bilemer.
Russian Tir, Vladimir Putin-i, November 1 nü ya linüki mangyimba anogo ka asütsü, ta sangdongogo.