Refugee 11 tzü nung arakset:Greece

Athens, November 01 (Agencies): Samos asetkong nung tanur trok dena, refugee 11 tzü nung arakset, ta coastguards temi ashi.
Tasür rongnung parnok 10 temang rong indang cabin nungi ngutetogo. Iba rong ya anasa aliba Turky tzükümlen nungi tzüsem tesashi aruba ajanga meküpokdakja liasü.
Ano tasür rongnung tetsür ka mangbo asetkong nung pungteta liasü. Tan amai mapang shia Europe-i arur refugee tem tzü nung taküm samar.
Coastguards temi ashiba agi iba rong ya tzüküm atongtsü metre 20 shi dang lia meküpok aser rong nungji nisung 15 shi liasü.
Hombarnü nungi Lesbos, Kalymnos aser Rhodes asetkongtem nung rong meküpokba aser tan meküpokba ajanga nisung 60 dak tema araksetogo aesr item rongnung tanur 23 shi dena lir.
Hokolbarnü tanur 17 dena parnok nisung 22 tashi Turkey anüdoklen aliba Aegean asetkong ajangtsü merangdang rong meküpoka asü. Iba tesem yagi Syria nunger refugee million aika jenaogo.
Ano Bodhbarnüa Lesbos, Samos aser Agathonissi asetkongtem nung rong pongu meküpokba lendong nung tanur 11 dena, parnok refugee 24 tashi süogo.
Tsüngküm nung tzüsem tesashi akümer aser Europe-i refugee aitba shibangtsü ta sangdongba sülen, Greece-i aruba mapang refugee 80 dak tema arakseta süogo, ta AFP osang ajanga ashi.
Küm tetenzük nungi tang tashi nung refugee 580,125 tashi Greece tongogo aser ano refugee 723,221 tashi Europe nung jenokogo, ta UN’s refugee agency (UNHCR) ajanga metetdaktsü.