Egypt nung tayimtsü tsükokba bushisüngdang tenzükogo

Cairo, November 01 (Agencies): Sinai peninsula, Egypt nung Honibar nü Russia nunger passenger tayimtsü ka tsükokba dak sentakba kuli Deobar nü nungi tenzüka International bushisüngdangertemi bushisüngdangdar, ta media ajanga ashi.
Egypt aser Russia linük naprong nungi bushisüngdangertemi Honibar nü nguteta aliba tayimtsü indang ‘black box recorder’ ana nung aliba osangtem (data) asadangdar, ta Xinhua osang ajanga ashi.
Deobar nü nungi ‘French Agency for Safety of Civil Aviation’ nungi mongin ana, Airbus consultant trok aser Germany nunger ana Egypt-Russia bushisüngdanger telok den adentsü, ta osang ajanga ashi.
Egypt nungeri aniba bushisüngdang nung adentsü asoshi Russia Emergency Minister, Vladimir Puchkov den bushisüngdangertem Honibar nü Egypt yimtiba, Cairo tongogo.
Iba tayimtsü nung nisung 224 mena liasü aser lendong nung yaritepertemi tasümang 163 nguteta lir, ta cabinet sangdong ka ajanga Deobar nü metetdaktsü.
Iba lendong ya Sinai tenemlen Honibar nü ataloka liasü aser iba tayimtsü tsükokbaji Egypt nung aliba IS teloki ta parnoki tenüng agiogo.
Egypt Ato Kilonser Sherif Ismail-i, ‘black box’ mangu tashibo iba tayimtsü koma ser tsükokar meshiteti liasü, ta ashi.
Mongintemi, “Technical tsütsü nungi bilemdangra ali nungi kanga talangka pilar tua yima aliba, iba tayimtsü kahzüka yoktsüji tamakoktsü lir,” ta ashiba Ismail-i metetdaktsüba den külemi paisa, mejangjatetba timtem kar ajanga iba tayimtsü tsükok südi, ta shisem.