Aor Telongjem !

Asen tetsü teboutem Chungliyimti lima nungi tang aliba Mokokchung district atongba sülen ano Mokokchung district nungi alima tasen bushia asenok Aortem prokshia libaliyima aoba tesemtem rongnung Dimapur nung alir Aotsür Aortem ya teimba asütsü. Joko, Dimapur district kübok alir nütsüngtem rongnungbo kin apidangra tsümartem serbo asenok Aor tiemba kümogo. Iba amaji asenok nem Tsüngremi alushia tuluka moaja lir. Tang tashi Dimapur district nung Aortemi akümba yim pezü pongo tashi lir aser iba denji mepu shia nung kilen züngdangra Aor kibongsa tiemba züngdangtettsü. Aji oda, Dimapur district nung tenzüka aliba Ao arogotemji züngdangra Mokokchung district nung kümteta aliba yimti tulutem den kasasa arogo tulu aika lir. Itemji Tsüngremi Aotsür Aor nem moatsüba tashi aser temoatsütem lir. Ajisüaka, asenok tangatetba tajung nung ka küma melongjemtetba agi asenok dak mapa tajung tulu inyaktsü koka lir ser nung meinyaktetter. Iba amaji yimten aser lokti nunga tangar makoker. Atangji, Dimapur district nung Aor telongjembo aika tenteta lir saka itemji pei pei sasep nung tentetba dang lir. Iba jagi aiben Dimapur nung alir Aotsür Aoertem telongjem nung shisa ka ser Naga nunger aser Aor ajungtsü asoshi jembia inyaktsü melen asenok o asenok na tsüngda dang meputep adoker. Tatishitsü agi, Dimapur district nung tenteta akaba Aor telongjem ka Ao Senden nung dena shilem aginü nunga Dimapur district nung tenteta akaba Aor telongjemtem tsüngda mulungmechiteptsüsa aiben ataloker. Ibaji asenok telongjem ka kübok tangatettep maliba ajanga tajung agi tamajung küma odaktsüba mapatem asütsü. Aji oda, tanü putu nung inyaktsüba mapa teimbaka Dimapur nung adoker asünungji, Aor aika Mokokchung district toktsür Dimapur nung arua senso küma alir, anungji joko Dimapur lima ya Aortem asoshi bendang lima masü asen lima kümogo. Joko, iba tangatetba nung Dimapur district nung alirtemiang Mokokchung district nung alirtem shisatsü aser rongsen agi yaritsüsa kümogo. Iba ama tensa tia ka nung asenok Dimapur nung nütsüng teimba küma oa pei senso lima küma libaliyima aor asünungji, joko Dimapur District Aor Telongjem ka tentet meshiogo ta bilemer. Iba jagi taoba Hopta nung asenoki iba onük nung ‘Koma süla ?” ta bilemdangogo. Atangji, telangzürtem rongnung, telok peria tenteta lir aser telok tentetbaji langka tajung inyaktsür masü saka saru züinba dang, anungji iba ama lokti tentet tasenji metentetang tajungba asütsü ta ashirtem teimba liasü. Ibaji kanga shitak lir, kechiyong tanübo telok tentetba agi asenok tajangzük anguba tilaba aser takoksa tuluba ta angur amai kümogo. Ajisüaka, asenoki saru tsübua telok metentetra, iba jagibo asenok tashimaitba dang akümtsü. Asenibo sarua magütsütsü saka telokbo tashi itta alitsüla ta bilemer asenok aika lir, iba jagi lokti senden nunga melongsur aser lokti mapa nunga shilem magir. Shitakba agibo, asen lokti tentet nem saru agütsür külenang tenla agütsütsüla, iba jagi dang loktiji tashi aittsü. Aji oda, lokti tentet aliba jagia kija aser kibong ajangzüktsüsa inyaktsüla. Atangji, yimten asüyonga, lokti asüyonga tashi aittsü maittsübaji tanishirtem dak dang keta lir. Iba tangatetba nung asenoki Dimapur District ama nung Aor telongjem ka tenteta alima aser nübortem meimba lenir tajung shima anidaktsüra, iba telok telongjemji Aortem asoshi dang masü saka Naga nunger rangben asoshi temoatsü asütsü. Dimapur ama nungbo yim tzükong kecha mali aser Jungli mongsen kecha mali, Aor senso süra ojang, iba jagi mapa tajung tuluka inyaktettsü. Aor longjembaji tangar asoshi tetsübutsüka masü saka mulung anisüngzükdak asütsüla. Atangji, Dimapur District nung tentetba Aor telongjem jagi Ao Senden den tokteptsü ta masü saka yaritsü mesüra onoki ashiba mangara onok madentsü ta asüba jakla nung masü saka shisa talang agi tangatetba tulu nung ano ken Ao kinjia Naga nunger rongnung tanishir ser Naga lima tajungba küma yanglutsü nükjidong nung telok tuluba küma longjemshitsü nüngdaker.